राष्ट्रिय स्वाधीनता रक्षा यायेमाः

डि.आर. खड्गी
फिजीया घटनापाखें शिक्षा कयाः मधेसवादीतय्सं सेनाय् नं थःगु पकड कायम यायेगु लागिं झिद्वः मधेसीयात सेनाय् भर्ति यायेमाः धकाः बः बियाच्वंगु खः।

शास्त्रय् थथे नं उल्लेख यानातःगु दु, 'राजनीति मूर्ख व्यक्तिया ल्हातय् लात धाःसा इमिसं भ्रष्टाचार व कमिशन नयेगुली जक ब्वाँय् जुयाः देशया आर्थिक अवस्थायात तहस�नहस याना बी। स्वार्थी व लोभी बुद्धिजीवीतय्सं राजनीति यात धाःसा देय्यात हे ध्वस्त याना छ्वइ। थ्वया अर्थ खः, मूर्ख नेतातय्गु उद्देश्य राजनीतिया नामं व्यापार यानाः अकुट सम्पत्ति कमे यानाः देशयात हानी यायेगु खः। स्वार्थी व लोभी बुद्धिजीवीं राजनीति यात धाःसा देश खतराय् लायेफु धयागु खँ नं शास्त्रय् उल्लेख यानातःगु दु।
नेपाःया प्रधानमन्त्री बाबुराम भट्टराई नं अति हे बुद्धिजीवी, शिक्षित व सक्षम व्यक्तित्व खः। वय्कः थःगु जीवनय् सेकेन्ड म्यान गबलें हे जुया मदी। सरकारी स्कूलय् अध्ययन यानाः नं वि.सं. २०२६ सालय् एस.एल.सी. परीक्षाय् वय्कः बोर्ड फष्ट जुयादीगु खः। थुलि जक मखु, उच्च शिक्षा अध्ययनया झ्वलय् नं बाबुराम भट्टराई शिक्षित बुद्धिजीवीया धलखय् नं न्ह्यःने लानाच्वंगु खः। वय्कः छम्ह सिर्जनशील व्यक्ति जक मखु, देश निर्माण यायेगु भिजन नं दुम्ह खः। उकिं नं वय्कःया नेतृत्वय् देश ठीक ढंगं संचालित जुइ धकाः जनतां भलसा कयाच्वंगु खः।
भाद्र ११ गते संविधानसभाया भवनय् चुनावया प्रक्रिया मार्फत बाबुराम भट्टराई प्रधानमन्त्री जुइत ताःलाःगु खः। तर थौंया अवस्थाय् जनता गुलि नं हर्ष व खुसी जुइमाःगु खः, उलि धाःसा जुयाच्वंगु दु। छाय्धाःसा भारतमुखी मधेसवादी दलत नाप प्यंगू बुँदाया सम्झौता देशया लागि घातक जुइफु। उगु सम्झौतां देशयात स्वयाः मधेसी दलतय्त जक फाइदा जुइगु खनेदु। प्यंगू बुँदे सम्झौता देशया लागिं घातक खः धकाः जनतां जक धयाच्वंगु मखु, स्वयं माओवादी पार्टीया सिद्धान्तवादी नेतातय्सं नं धयाच्वंगु दु। 'थ्व सम्झौता भारतया चाहना कथं जूगु खः' धकाः माओवादी पार्टीया सचिव सी.पी. गजुरेलं द्वपं नं बिल। तराईया सामन्ती पुचः मधेसवादी दलतय्गु मुद्दाय् माओवादी पार्टी लिउ लिउ वनाः देशयात तःधंगु संकटय् लाकेत स्वयाच्वंगु दु। प्यंगू बुँदे सम्झौताय् झिद्वः मधेसीतय्त नेपाली सेनाय् भर्ति यायेमाःगु व संघीय गणतन्त्र माःगु थ्व निगू नेपाःया लागि कालकूट विष खः। मधेसवादी सामन्तीतय्गु पार्टीं नेपाःया कल्याणया लागि राजनीतिया नामं अकुट सम्पत्ति कमे यानाः मस्ति जुइगु व मेगु भारतया चाहना कथं राजनीतिक खेल म्हिताच्वनी। छगू सुपुर्दगी सन्धी याकाः नेपाःया जनतायात अति टेन्सन बीगु व मेगु एयर मार्शल तयेगु धकाः त्रिभुवन विमानस्थलय् भारतया सेना तैनाथ यायेगु नं भारतया हे चाहना खः। थ्व निगू देश घातक भारतवादी नेता सूर्यबहादुर थापां आँट मयाःगु जूसां माओवादी नेतातय्सं कुतः यानाच्वंगु दु धकाः नं गजुरेलं द्वपं बिउगु दु।
झीगु धापू तराईवासीतय्त राज्यया अवसरं बञ्चित यायेगु मखु। झीगु धापू ला वास्तविक पीडित तराईवासीतय्त राज्यं सहयोग व सहुलियत बियाः न्ह्यःने हयेमाः धयागु जक खः। तराईया भूमिपुत्र थारु जाति खः। बहुसंख्यक थारु जाति अति पीडित जुयाच्वंगु दु। थुपिं थारु जातियात षड्यन्त्र यानाः सामन्तीतय्सं उमिगु भूमि कब्जा यानाच्वंगु दु। न्हापा जुजुया आसेपासे खसब्रम्हू व मेमेगु जातिं थारुतय्त शोषण यानाच्वनी। थौंकन्हय् विहारीमूलया सामन्ती नेतातय्सं थारु जाति व मेमेगु अल्पसंख्यक जातियात तसकं शोषण यानाच्वंगु दु। थौं विहारीमूलया सामन्तीतय्सं मधेसवादी पार्टी शक्तिशाली जुजुं वनाच्वंगु दु। थ्व पार्टी शक्तिशाली जूगु नं भारतया आशिर्वादं हे खः। मधेसवादी पार्टी खालि तराईयात जक मखु स्वनिगःया सिंहदरबारयात नं अधिनय् तयेगु कुतः यानाच्वंगु दु। मधेसीत राजनीतिक रुपं झन झन शक्तिशाली जुजुं वनाच्वंगु दु। अझ भविष्यय् इमिगु शक्ति झन् अप्वइगु संकेत नं खनेदु। छाय्धाःसा आः नं विहारीतय्सं चांचां नेपाःया नागरिकता कायेगु ज्या यानाच्वंगु दनि। मधेसीतय्सं नेपाःया कार्यपालिका, न्यायपालिका व व्यवस्थापिका नं कब्जा यायां वनाच्वंगु दु। मधेसीतय्सं राष्ट्रिय पोशाक व नेपाःया ध्वाँय् तकं च्याकेगु ज्या न्ह्याकेधुंकूगु दु। थुलि जुइधुंकाः भविष्यय् थुमिसं नेपाःयात हानि जुइगु मेगु छुं ज्या मयाइ धकाः धाये फुगु अवस्था मदु। मधेसवादी पार्टीं झिद्वः मधेसीतय्त नेपाली सेनाय् भर्ति यायेमाः धाःगु नं थुगु हे कारणं खः।
न्हापा फिजी देशय् भारतीय मूलया महेन्द्र चौधरी प्रधानमन्त्री जूगु इलय् भारतीय मूलया बासीयात बाहेक फिजीया जनताया हित जुइगु छुं हे ज्या मयाःगु थुथाय् लुमंकेबहः जू। थ्व हे कारणं फिजीया राष्ट्रभक्त सेनां कू यानाः चौधरीयात पदं चीका छ्वःगु खः। फिजीया घटनापाखें शिक्षा कयाः मधेसवादीतय्सं सेनाय् नं थःगु पकड कायम यायेगु लागिं झिद्वः मधेसीयात सेनाय् भर्ति यायेमाः धकाः बः बियाच्वंगु खः।
ठग मध्ये नं उच्चस्तरया ठग राजनीतिक नेतात धाइ। थ्व धापू नं नेपाःया सन्दर्भय् मिले जुयाच्वंगु दु। नेपाःया ततःधंगु पार्टीतय्सं जनताया न्ह्यःने आश क्यनाः तःक्वःमछि हे ध्वं लाये धुंकल। माओवादी नं जनयुद्धया इलय् जुजु, काँग्रेस व एमालेया न्ह्यःने बचं बियावःगु पार्टी खः। गुगु इलय् उदारवादीया नामं पुँजीपति समर्थक पार्टी व भारतीय पुँजीपतिं सरकारलिसे ल्हाः मिले यानाः राष्ट्रिय अडान त्वःता वन उगु हे इलय् माओवादी पार्टीप्रति जनताया आशा निराशाय् हिल। अझ नं ई दनि, ष्ट्रिय स्वाधीनता व अखण्डताया रक्षा यानाः जनजीविकाया समस्या समाधान यायेगुली सकलें न्ह्याये नु।

More Stories Like this