'भाषा म्वाकेत नेवाः प्रदेश हे माः'

येँ (सन्ध्या टाइम्स)/केन्द्रीय मानन्धर संघया ग्वसालय् म्हिगः 'नेवाः भाय् व नेवाःत' विषयय् छगू गोष्ठी जुल। ज्याझ्वलय् नांजाःम्ह उपन्यासकार मथुराकृष्ण साय्मिं मूल विषयय् ज्यापौ न्ह्यब्वयादीगु खः। ज्यापौ न्ह्यब्वसें वय्कलं इतिहासकालंनिसें थौं तक थ्यंबलय् नेवाः भाय् गुकथं ह्रास जुजुं वन व थुकी स्वय्म नेवाःत नं गुलि दोषी खः धइगु कुलादिल। आः नेवाः भाय्यात हानं म्वाकेगु खःसा देशय् राजनीतिक परिवर्तन यानाःलि नेवाः स्वायत्त राज्य पलिस्था यायेमाःगु निष्कर्ष वय्कलं ज्यापती न्ह्यथनादीगु दु।
ज्यापौयात कयाः टिप्पणी यासें डा. जगदिश मानन्धरं मल्लकालया ६०० दँ नेवाः वाङ्मयया लागिं स्वर्णिम काल खःसां वयां लिपा थ्व भाय्या विनास सुरु जुल धयादिल। कवयित्री प्रतिसरा साय्मिं मस्तय्त मांभाय् स्यनेगु ज्या मांपिंसं जक यायेमाः धइगु मदु, उकी बौपिनिगु नं उतिकं भूमिका दइगु खँ कुलादिल। 'सन्ध्या टाइम्स' या सम्पादक सुरेश किरण मानन्धरं नेपालमण्डलया नेवाःतय्सं आःतक परिचयया संकट महसुस मयाःनि, थ्व संकट महसुस यात कि तिनि भाय् प्रति मतिना याना हइ धयादिल।
ज्याझ्वलय् थःपिनि बिचाः तयेगु �वलय् भाषाविद् डा. तेजरत्न कंसाकारं नेवाःतय्सं भाय् त्वःतूगु थीथी कारणतय् बारे चिन्तन यायेमाःगु खँ कनादिलसा बाखंच्वमि लक्ष्मण राजवंशीं भाषाया बजार मदया वंगु कारणं थम्हं हे थःगु छेँय् मस्तय् खय् भाय् स्यनातयागु खँ कनादिल। पंचकुमारी मानन्धरं थःथाय् छेँय् नं मस्तय् खँय् भाय् स्यना तयागु खँ कँसे भाषा बचे यायेगु रणनीति दयेकेमाः धयादिल। पुलांम्ह सभासद् लक्ष्मीदास मानन्धरं नेवाः भाय् ब्वनीपिं विद्यार्थी गथे म्हो जुल धइगु बारे कार्यपत्रय् विश्लेषण मजूगु टिप्पणी यानादिलसा नेपाः राष्ट्रिय पार्टीया नायः डा. केशवमान शाक्यं मानन्धर संघ थेंज्याःगु जातीय पुचःतय्सं नेवाः भाय् व जातिया बारे थज्याःगु गोष्ठी यात धाःसा थ्व खँ क्वय् क्वय् थ्यंक थ्यनी धासें ग्वसाःया प्रशंसा यानादिल।
केन्द्रीय मानन्धर संघया नायः न्हुछेबहादुर मानन्धरया सभापतित्वय् जूगु उगु ज्याझ्वलय् ज्याझ्वःया उद्देश्य बारे मानन्धर सफूकुथिया नायः लक्ष्मीबहादुर मानन्धरं ध्वाथुइकादीगु खः।
उगु हे ज्याझ्वलय् कुतः पिकाकपाखें पिदंगु भाजु मथुरा साय्मिया न्हूगु बाखं सफू 'ब्लू डल' नं विमोचन जूगु खः।