नेवाः स्वायत्त राज्यया लागिं ज्यापु सम्मेलन

तोखा (सन्ध्या टाइम्स)/'नेवाः स्वायत्त राज्यया निंतिं निक्वःगु राष्ट्रिय तःमुँज्या' धइगु मू नारा बियाः ज्यापु महागुथिया राष्ट्रिय महाधिवेशन म्हिगः उलेज्या जुल।
संविधानसभाया अध्यक्ष सुवासचन्द्र नेम्वाङं तःमुँज्या उलेज्या यानादीगु खः। ज्याझ्वलय् न्ववासें वय्कलं संविधानसभापाखें संविधान दयेकेगु धइगु तसकं हे महत्वपूर्ण ज्या जूगु दु धयादिल। वय्कलं संविधानसभाय् थौं राज्य पुनर्संरचना, संघीयता व राज्य शक्तिया बाँडफाँडया विषयय् सहमति जुइ मफयाः संविधान पित बी मफयाच्वंगु खँ नं अन कुलादिल। वय्कलं सहमतीय वातावरणय् ज्यापु महागुथिया निक्वःगु राष्ट्रिय तःमुँज्याया बन्द सत्र क्वचायेमा धकाः भिंतुना नं देछानादिल।
ज्यापु महागुथिया केन्द्रीय नायः विपेन्द्र महर्जनया सभापतित्वय् जूगु ज्याझ्वलय् मूछ्यांज्ये राजभाइ जकःमिं लसकुस यानादीगु खः।
ज्याझ्वलय् नेपाली कांग्रेसया सभासद् तीर्थराम डंगोल, एकीकृत नेकपा (माओवादी)या सभासद् राजकाजी महर्जन, माओवादीया पोलिटब्यूरो दुजः दिलबहादुर चित्रकार, एमालेया केन्द्रीय दुजः राजेन्द्र श्रेष्ठ, नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दर, नकिं डा. चुन्दा बज्राचार्य, त्रिभुवन विश्वविद्यालयया उप कुलपति प्रा.डा. हिराबहादुर महर्जनपिंसं नुगःखँ तयादीगु खः।
ज्याझ्वलय् ज्यापु जुयाः थीथी ख्यलं राष्ट्रयात योगदान यानादीपिन्त हंगु खः। हनेज्याय् उपकुलपति प्रा.डा. हिराबहादुर महर्जन, राष्ट्रिय प्रतिभा पुरस्कार २०६८ त्याकादीम्ह चित्रकार कमलेश महर्जन, जापानय् किक बक्सिङ कासाय् न्हाप जुयादीम्ह मोहन महर्जन 'ड्रागन', बक्सिङ कासामि दीपक महर्जन, नेपाल विद्याभूषण पदक कयादीम्ह किरण महर्जन व सगरमाथा गःम्ह सन्तकुमार महर्जनयात हनेज्या यायेगु ज्या नं जूगु खः। थुकथं हे महाधिवेशनया उलेज्या जूगु थाय् तोखाया थीथी खलःया गुरुपिं व देय् थकालियात नं हनेज्या याःगु खः।
व्यवस्थापन कवःया कजि बाबुराजा प्रजापतिं सुभाय् न्वचु बियादीगु खः। महागुथिया छ्यांज्ये अनुपसिं सुवालं न्ह्याकादीगु उगु ज्याझ्वलय् केन्द्रीय न्वकुपिं राजभाइ ज्यापु व बुद्धिलाल ज्यापुया नं उपस्थिति दुगु खः। थौं तःमुँज्याया बन्द सत्र न्ह्यानाच्वंगु दु।