लामातारय् विमान दुर्घटना

चालक दल व यात्रु नापं १९ म्ह मंत

येँ (सन्ध्या टाइम्स)/माउण्टेन फ्लाइटया नितिं ब्वःगु बुद्ध एयरया विमान थौं सुथय् यल जिल्लाया पहाडी लागाय् दुर्घटना जुयाः चालक दल नापं विमानय् दुपिं १९ म्हं मनू सीगु दु ।

बुद्ध एयरया ९-एन-एके १९०० विमान थौं सुथय् सवा ७ बजे मौसमया खराबीं यानाः दुर्घटनाग्रस्त जूगु अनुमान याःगु दु। दुर्घटनास्थलय् १८ म्हेसियां सीम्ह लुयावःगु दुसा निराजन कर्माचार्य छम्हेसित घाइते अवस्थाय् लुइकूगु खः। तर यलया बी एण्ड बी अस्पताल हत्तले वयागु नं मृत्यु जूगु दु ।

सुथय् खसु वयाच्वंगु इलय् यलया बिशंखुनारायण व लामाटार गाविसया सीमा लागाय् लाःगु कोटडाँडा धइगु थासय् उगु विमान दुर्घटना जूगु खः। उद्धार ज्याय् संलग्न स्थानीयवासी केशव थापां घटना बारे संचारकर्मीतलिसे खँल्हासें धयादिल, 'सुथय् खसु वयाच्वंगु खः, न्हापां जहाजया आवाज वल, भचा जायेवं हे तःधंगु सः वल, अनं लिपा नवःगु गन्ध वयेवं जहाज दुर्घटना जूगु अनुमान जिमिसं याना। जिमिसं अन मालेगु नापं प्रहरीयात खबर याना ।'

मेम्ह स्थानीयवासी हरि थापां कनादी कथं न्हापां विमानया पां वय्कःया छेँय् थिया वंगु खःसा वयां लिपा दुर्घटना जूगु खः। विमानय् न्यानाः आम्लिमा छमा नं क्वःदःगु दु। दुर्घटनाय् लानाः विमान कुचाकुचा जूगु खः। गुलिस्यां विमान कुतुं वये न्ह्यः हे सर्गतय् मि च्याःगु खँ नं कंगु दु। विमानय् चालक दलया दुजःत क्याप्टेन जीवी ताम्राकार, सहचालक पद्मा अधिकारी व विमान परिचारिका अस्मिता श्रेष्ठ दुगु खः। विमानय् झिम्ह भारतीय, स्वम्ह तेस्रो मुलुकयापिं व स्वम्ह नेपाःमि दुगु खः ।

दुर्घटनाया कारण मौसमया खराबी
जल तथा मौसम पूर्वानुमान महाशाखां विमान दुर्घटनाया मौसमया खराबी खः धाःगु दु। सुथय् नागरिक उड्डयन प्राधिकरणं मौसमया जानकारी हे मकाःगु खँ न्ह्यथंगु दु। महाशाखाया बरिष्ठ मौसमविद् राजेन्द्र श्रेष्ठं धयादिल, 'जिमिसं न्ह्याबलें नं मौसमया अवस्था बारे जानकारी बिया वयाच्वनागु दु। थौं मौसमया अवस्था बारे विवरण मकाः।' वय्कःया कथं चछि हे खसु व वा वयाच्वंगु कारणं घटनास्थलय् ख्वातुक हुसु वयाः 'भिजिविलिटी' म्हो दुगु खः ।

सीपिनि नां धलः
नेपाःमि: विमान चालक दलया दुजः क्याप्टेन जीवी ताम्रकार, सहचालक पद्मा अधिकारी व विमान परिचारिका अस्मिता श्रेष्ठ। यात्रु: शारदा कर्माचार्य, जगजन कर्माचार्य व निराजन कर्माचार्य
।
भारतीय यात्रुतःपंकज मेहता, छाया मेहता, एच डी नागराज, एल नागराज, आई नागराज, एस नागराज, डी तालोसुब्रियम, डीपी तालोसुब्रियम, नागराज तालोबुब्रियम, पी तालो सुब्रियम ।

मेपिं विदेशी: इण्ड्रे वेइड, मिस तोशिनोरी क्वेज्म व मिस नाताली नेइलन (इमिगु राष्ट्रियता सीके मफुनि।)