ज्यापु महागुथिया राष्टि्रय महाधिवेशनया उलेज्या
येँ/"नेवा: स्वायत्त राज्यया नितिं निक्व:गु राष्टि्रय त:मुँज्या" धइगु मू नारा बिया: थौं ज्यापु महागुथिया राष्टि्रय महाधिवेशनया थौं उलेज्या जुल ।
संविधानसभा अध्यक्ष सुवासचन्द्र नेम्वाङया मूपाहाँसुइ जूगु ज्याझ्वलय् सम्बोधन यायेगु झ्वलय् वय्कलं संविधानसभापाखें संविधान दयेकेगु धइगु तसकं हे महत्वपूर्ण ज्या जूगु धयादिल । वय्कलं संविधानसभाय् थौं राज्य पुनर्संरचना, संघीयता व राज्य शक्तिया बाँडफाँडया विषयस सहमति जुइ मफया: संविधान पित बिइ मफयाच्वंगु खँ उलादिल । वय्कलं सहमतिय वातावरणय् ज्यापु महागुथिया निक्व:गु राष्टि्रय त:मुँज्याया बन्द सत्र क्वचायेमा धका: भिंतुना देछानादिल ।
ज्यापु महागुथिया केन्द्रीय नाय: विपेन्द्र महर्जनया सभापतित्वय् जूगु ज्याझ्वलय् मूछ्याञ्जे राजभाइ जक:मिं लसकुस यानादीगु ख: ।
ज्याझ्वलय् नेपाली कांग्रेसया सभासद् तीर्थराम डंगोल, एकीकृत नेकपा माओवादीया सभासद् राजकाजी महर्जन, माओवादीया पोलिटब्यूरो दुज: दिलबहादुर चित्रकार, एमालेया केन्द्रीय दुज: राजेन्द्र श्रेष्ठ, नेवा: स्वायत्त राज्य मंका: संघर्ष समितिया सचिवालय कजि मल्ल के. सुन्दर, नकिं डा. चुन्दा बज्राचार्य, त्रिभुवन विश्वविद्यालयया उपकुलपति प्रा.डा. हिराबहादुर महर्जन पिसं नुग:खँ तयादीगु ख: ।
ज्याझ्वलय् ज्यापु जुया: थीथी ख्यलं राष्ट्रयात योगदान यानादीपिन्त हंगु ख: । हनेज्याय् उपकुलपति प्रा.डा. हिराबहादुर महर्जन, राष्टि्रय प्रतिभा पुरस्कार २०६८ त्याकादीम्ह चित्रकार कमलेश महर्जन, जापानय् किक बक्सिङ कासाय् न्हाप जुयादीम्ह मोहन महर्जन 'ड्रागन', बक्सिङ कासामि दीपक महर्जन, नेपाल विद्याभूषण पदक कयादीम्ह किरण महर्जन व सगरमाथा ग:म्ह सन्तकुमार महर्जनजुयात हनेज्या यायेगु ज्या जूगु ख: । थुकथं हे महाधिवेशनया उलेज्या जूगु थाय् टोखाया थीथी खल:या गुरुपिं व देय् थकालियात नं हनेज्या या:गु ख: ।
व्यवस्थापन कव:या कजि बाबुराजा प्रजापतिं सुभाय् न्वचु बियादीगु ख: । ज्याझ्व: महागुथिया छ्याञ्जे अनुपसिं सुवालं न्ह्याकादीगु ख: । ज्याझ्वलय् केन्द्रीय न्वकुपिं राजभाइ ज्यापु व बुद्धिलाल ज्यापु नं उपस्थित जुयादीगु ख: ।
News Location:
