म्हग्स

त्रिरत्न शाक्य

ई बिनावं लिसे एअरपोर्टया ध्वाखां पिने मनूतय्गु चहःपहः अप्वया वल । पलख न्ह्यः तक सुनसानगु थाय् हाटबजाः थें खनेदत । च्या मिइपिं निसें डलरया कारोवार याइपिं तकं दु अन । सकलसिया ख्वालय् न्हिलासु दु अन । तर टर्मिनल भवनया रिसिभिङ्ग सेक्सनया मेचय् फ्यतुनाच्वंपिं हरि व भगतया ख्वाः खिउँसे च्वं । छुं तंका च्वंपिं थें । छुं स्यंका च्वंपिं थें, निम्हं चुपचाप । घौछिं मयाये धुंकल फ्यतुनाच्वंगु । अयनं हवाइजहाज थ्यंक मवः । दश बजे ति जुल । हुनुनु ब्वयावःगु हवाइजहाजं सकस्यां मिखा आकासय् पाखे वन । हवाजइजहाज कतारं हे वःगु खः । निम्ह जुरुक्क दनाः ग्राउण्डय् थ्यनेवं यात्रुत न्हिला न्हिला कुहांवल । त्वःमफिक्क कुहां वक्क यात्रुतय्त स्वयाच्वन । झन् खिफाय् च्वफाय् थें जुयावल इमित । यात्रुत कुहांवये क्वचायेवं बुलुहुं ककपिटया लुखा चाल । कुरियरया सामान ल्ह्ययेगु झ्वलय् निम्ह लोडरतय्सं मफु मफु ल्ह्वनाः भेनेस्ताया ताःहाकःगु बाकस पिनेहल । हरि व भगत झसंक वन । ताःहाकः सासः ल्हात । जगतया लास स्वथनाहःगु बाकस वहे खः । मन मच्वन । हथाय्सं रिसिभिङ्ग अफिसय् वनाः स्वल । बाकसय् च्वयातःगु ब्वन । Jagat Ktm, weight 62 kg death date 2011..
ल्हाःचिं तयाः लास दुगु बाकस ज्वनाः इपिं मसां स्वयाः लिहांवल । शवबाहन घाटय् थ्यन । निम्हस्यां बाकस ल्ह्वनाः पिने हल । माहाद्यः लिक्क फ्यतुना च्वंम्ह रुकमणी छक्वलं ह्वाँय् ह्वाँय् ख्वयाहल । घाटया लकसयात छक्वलं शोकाकुल यानाबिल ।
जिमिसं बाकसया नकिं त्वफ्यना । प्लाष्टिकं प्वःचिनातःगु जगतया सीम्ह खनाः लकसयात झन् शोकाकुल यानाबिल । मिखाय् ख्वबि मवःपिं छम्ह हे मन्त अन । सीम्ह ल्ह्वनाः खुसी सिथय् ल्वहंया फातय् ग्वारातुइकल । परिस्थिति गुलि क्रुर खनिसा, ल्याय्म्हया बैंसय् हे लसतां ह्वनाच्वंगु तिपु जीवनयात फायाबिल । जगतया अकल्पनिय मृत्यु जुल । थःगु देशय् मखु, कतःया देशय् मन्त । काय्यात बोर्डिङ्गय् ब्वंकेगु म्हगस ज्वनाः कतार वंम्ह दछि हे मदुनिबलय् हे लास जुयाः लित हइच्वन । रुकमणिया जगत आमैंया चा थें खिउँया वन । म्हगसया छेँ छत्थुं घ्वाररर दुनावन । घाटय् ग्वारा तुइकातःगु जगतया सीम्हयात सकस्यां मौन श्रद्धाञ्जलि बिल । दकलय् लिपा ज्ञानीमाया ततां रुकमणियात घयेपुनाः अन्तिम श्रद्धाञ्जलिया नितिं थनाहल । रुकमणिं जगतया तुतिपालि जक छु ज्वनेलात, अन हे बेहोस जुयाः ग्वारा तुवन ।
'का.. का... मखुथें जुल । म्वाल, भम्चायात छेँय् यंकूसां जिल ।'
'मखु... मि तयेमानि ।' लिक्क च्वंम्ह हरिं धाल ।
आकछियाय् ! छु धइगु छं काय् दयेक दयेकं मिस्तय्सं मि तये धैगु नं दइला ?

जगतया काय् सुशान्तं बौ मदुगु हे मस्यू । व होस्टेलय् च्वना हे जाँच बियाच्वंम्ह । बौया म्हय् मि तयेगु धइगु जाँचय् फेल जुइगु हे खः । सुशान्त हे जगतया म्हगस खः । उकिं रुकमणियात हे मि तयेके बीगु क्वःछिनातःगु खः भगत व हरिं । तर सामाजिक मूल्य मान्यता हाचां गायेत तसकं थाकु । सनावःपिं भुनुभुनु हालाच्वंगु इमिसं बांलाक थू । अथेसां उमिसं संकल्प हे यात 'मि रुकमणि तताजुयात हे तयेके बीगु ।' सनावःपिं मध्ये दक्कलय् ज्याथःम्ह गोबिन्द हे खः । गोविन्द दाइ नं गथे धाल अथेहे यायेगु । बैंश ज्याथःसां गोविन्द दाइया बिचाः ल्याय्म्ह । थौकन्हय्या पिनि नितिं गोबिन्द दाइ प्रेरणाया पुञ्ज हे । गोबिन्द दाइ बुलुहुँ न्ह्यःने वयाः धाल -'जगतया बच्छि जीवन धइगु रुकमणि हे खः । जाँच बियाच्वंम्ह काय्यात मि तयेके बीगु धइगु फेल यायेगु हे खः । पिलिपिलि च्यानाच्वंगु रुकमणिया म्हगसया मत स्यायेगु खः । थ्व झीगु धर्म मखु । रुकमणिं मि तयेवं स्यनीगु छुं हे मदु । आखिर परम्परा ला झीस हे दयेकेगु खः ।'

गोविन्द दाइनं थुलि धायेवं भुनुभुनु हालाच्वंपिनिगु म्हुतुप्वाः तक्क दित । रुकमणि स्वचाः चाःहिलेधुंकाः जगतया छ्यनय् दागबत्ति दिकल । जगतया सीम्ह ह्वाना ह्वाना च्यानाच्वन । अनलिं सिं वांछ्वयेत वःम्ह घात वैद्यं हालाहल 'न्हापा न्हापा थथे बाकसय् तयाहइगु लासत मवः । आःला न्हियान्हिथं धइथें हे लास वयाच्वंगु दु । सीत वंपिं खः वा धेबा कमय् यायेत वंपिं खः, जिं ला छुं हे मस्यू ।'अबले हे थुखे फलय् एक तमासं अखवार ब्वनाच्वंम्ह भाजुं घात वैद्यया ल्हातय् अखवार बस्वाना बिल 'विदेशय् वनीपिं युवा रोजगारपिनि आवश्यकता अप्वया वःगुलिं थुगुसि विदेसय् वनीपिं ल्याय्म्हतय्गु ल्याः अप्वयेकाः थप स्वीगू प्रतिशत रेमिट्यान्टं आम्दानी बढे यायेगु जुइ ।'

More Stories Like this