लुम्ले विरुद्ध फेशबुक अभियान

येँ(सन्ध्या टाइम्स)/ बेलायतया लागिं हि बाः वयेकाः ल्वाःपिं गोर्खाली भूतपूर्व सैनिकयात बेलायतय् च्वनेगु अनुमति बीमाः धकाः अभियान चले याःम्ह नांजाःम्ह अभिनेतृ जोना लुम्ले विरुद्ध थौंकन्हय् बेलायतय् फेशबुक अभियान न्ह्यानाच्वंगु दु।
लुम्लें अभियान हे न्ह्याकाः गोर्खालीतय्त बेलायतय् दुकाल धासें वय्कःया विरोधय् फेश बुकय् च्वयेगु ज्या न्ह्यानाच्वंगु खः।
लुम्ले समेतया अभियान सफल जुइवं बेलायती सरकार भूपू गोर्खा सैनिकतय्त पेन्सन लिपा बेलायतय् च्वनेगु अनुमति बिउगु खः। वयां लिपा नेपाः त्वःताः वंपिं भूपू गोर्खा सैनिकत अनया एल्डरसट धाःगु थासय् च्वनेगु सुरु याःगु खः। गुलिं चाहिं फल्कस्टोन, कोल्सेस्टर व लण्डनय् नं च्वनाच्वंगु दु। छक्वलं आपालं ल्याखय् भूपू गोर्खाली च्वं वयेवं उगु लागाय् तसकं भीडभाड खने दुगु व थुकिं यानाः स्थानीय अधिकारीतय्त उमित सुविधा बीत तकं थाकुगु कारणं यानाः स्थानीय मनूत तम्वःगु दु।
उगु थासय् च्वं वःपिं गोर्खा सैनिकतय् ल्याः गुद्वः थ्यने धुंकूगु दु। तर उपिं सुं हे अंग्रेजी भाय् मसःपिं व छुं ज्या तकं मयाइपिं धासें स्थानीय मनूतय्सं उमित मययेका हःगु दु। थ्वहे झ्वलय् उमित दुकायेगु ज्या याःम्ह लुम्ले खः धासें थ्व विरोध अभियान न्ह्याकूगु खः।