सभापति भेलाया विवाद

भेलाय् ब्वति काल धाःसा कारवाही यायगु कोइरालाया ख्याच्वः

येँ (सन्ध्या टाइम्स)/भातृ संगठन भंग याःगु खँयात कयाः नेपाली कांग्रेस दुने ब्वलंगु कचवं समाधान यायेत पुलांम्ह प्रधानमन्त्री शेर बहादुर देउवां सःतूगु देय्न्यंकं जिल्ला सभापतितय्गु भेला याके मबीगु लागिं पार्टी सभापति सुशील कोइरालां पलाः ल्ह्वंगु दु ।

देउवां सःतूगु सभापतितय्गु भेला याके मबीगु लागिं केन्द्रीय सभापति कोइरालां पलाः ल्ह्वनेवं कांग्रेस दुने पिहां वःगु विवाद आः झन् 'आमने-सामने'या अवस्थाय् थ्यंगु दु।
पुलांम्ह प्रम लिसें वरिष्ठ नेता शेरबहादुर देउवाया छेँय् म्हिगः च्वंगु मुँज्यां पार्टीपाखें नकतिनि याःगु प्यंगू भातृ संगठन भंगया निर्णय लित कायेकेगु लागिं पार्टीयात दवाव बीत जिल्ला सभापतितय्गु भेला सःतेगु धकाः निर्णय याःगु खः। तर उगु निर्णय जूगुयां छन्हु लिपा हे थौं केन्द्रीय सभापति सुशील कोइरालां आपालं जिल्ला सभापतितय्त फोन यानाः देउवां सःतूगु सभापति भेलाय् ब्वति काये दइ मखु धकाः निर्देशन बियादीगु खँ सीदुगु दु ।

सूत्रं धाः कथं पार्टीया निर्णय अःखः ज्याखँ यायेत सःतूगु अज्याःगु भेलाय् सुनां नं ब्वति काये दइ मखु धकाः पार्टीपाखें आः औपचारिक रुपं सर्कुलर तकं जारी यायेगु कुतः नं जुयाच्वंगु दु। छुं जुयाः सर्कुलर जारी जुइधुंकाः नं उकी सुनां नं ब्वति काल धाःसा उमित कारवाही यायेगु ख्याच्वः समेत बिउगु खँ धाःगु दु। देउवा पक्षं धाःसा थ्वहे मोहनि न्ह्यः येँय् अज्याःगु भेला सःतेगु धकाः निर्णय याःगु खः। भेलां पार्टीपाखें याःगु प्यंगू भातृ संगठन विघटनया निर्णय लित कायेमाः धकाः दवाव बीकी धाःगु दु ।

लिसें वहे भेलां स्वन्ति सिधयेवं हे पार्टीया महासमिति बैठक सःतेमाः धकाः दवाव बीगु खँ नं धाःगु दु। अथे हे महासमिति बैठक लिपा हे महाधिवेशन सःतेमाः धइगु तकया माग नं सभापति भेलां यायेफु धाःगु दु। सभापति भेलाया मिति धाःसा क्वःछिउगु मदुनि ।

अनसनकारी विरामी
थ्व हे झ्वलय् पार्टीपाखें याःगु भातृ संगठन भंग यायेगु निर्णयया विरोधय् पार्टीया मू ज्याकू सानेपाय् थीथी भातृ संगठनया कार्यकर्तातय्सं सुरु याःगु अनसनय् च्वंपिं स्वम्ह अनसनकारीतय्त थौं अस्पताल यंकूगु दु ।

म्हिगः नं छुं अनसनकारीत विरामी जूगु खःसा थौं अम्बिका न्यौपाने लगायतया कार्यकर्तातय्त अस्पताल भर्ना याःगु खँ सीदुगु दु। अनसनकारीतय्त ब्लड प्रेसर थहां वनीगु, कब्जियत जुइगु थेंज्याःगु समस्यात पिहां वःगु खँ धाःगु दु। अनसनकारीतय्त म्हिगः तिनि देउवा पक्षं वनाः पुनः समर्थन व्यक्त याःगु खः ।