महासचिव मुन, राष्ट्रपति ओबामालिसे प्रधानमन्त्री भट्टराईया भेटवार्ता

येँ(सन्ध्या टाइम्स)/प्रधानमन्त्री डा.बाबुराम भट्टराईनं राष्ट्रसंघया महासचिव बान कि मुन, अमेरिकाया राष्ट्रपति बाराक ओबामा नापं मेमेपिं नेतातलिसे भेटवार्ता यानादीगु दु।
वंगु चान्हय् महासचिव बान कि मुनयात नापलानाः नेपाःया शान्ति प्रक्रिया व संविधान निर्माणया बारे जुयाच्वंगु प्रगतिया बारे सहलह ब्याकूगु दु धकाः प्रधानमन्त्रीया सहयोगी विश्वदीप पाण्डें जानकारी बियादीगु दु।
उगु इलय् बानया जिज्ञासायात कयाः प्रधानमन्त्री भट्टराईनं दक्व दलतलिसे जानाः सहमति यानाः न्ह्याःवनेत थम्हं भूमिका म्हिता वया च्वनागु दु धकाः जानकारी बियादीगु खः।
अथे हे अमेरिकाया राष्ट्रपति ओबामालिसे नं चीहाकलं खँ ल्हायेगु झ्वलय् प्रधानमन्त्रीं नेपाःया शान्ति प्रक्रिया बारे कनादीगु खः।
आबामां बिउगु रिसेप्सन पार्टीया झ्वलय् अथे खँ जूगु खः। उगु हे कथं प्रधानमन्त्री भट्टराई व श्रीलंकाया राष्ट्रपति महिन्दा राजपाक्षेया नं भेटवार्ता जूगु दु। उगु इलय् लुम्बिनी विकासय् सहकार्य यानाः वनेगु बारे सहलह जूगु खः।
वंगु चान्हय् हे प्रधानमन्त्री डा. बाबुराम भट्टराई व भुटानया प्रधानमन्त्री जिग्मे थिन्लेया दथुइ भेटवार्ता जूगु दु। उगु इलय् नेपालय् दुपिं भुटानी शरणार्थीतय्त स्वदेशय् लित यंकेगु बारे सहलह जूगु खः। भेटवार्ताया झ्वलय् प्रधानमन्त्री भट्टराईनं शरणार्थी लित यंकेत इनाप यानादीगु खःसा भुटानया प्रधानमन्त्री थिन्लें पुनः प्रमाणीकरण यानाः थःगु देय्या नागरिकत स्वदेशय् यंकेगु बचं बियादीगु खः।
प्यालेष्टाइनया पक्षय् मतदान यायेगु जुइः भट्टराई
अरब मुलुक प्यालेष्टाइनयात बिस्कं राष्ट्रया मान्यता बीगु/मबीगु धइगु प्रस्तावय् राष्ट्रसंघय् जुइगु मतदानय् नेपालं प्यालेष्टाइनया पक्षय् मतदान याइगु जूगु दु।
कन्हय् महासभाय् उगु प्रस्ताव यंकेगु तयारी जुयाच्वंगु इलय् प्रधानमन्त्री डा. बाबुराम भट्टराईनं अथे धयादीगु खः।
वय्कलं वंगु चान्हय् न्यूयोर्कय् दुपिं नेपाःमि संचारकर्मीतलिसे खँल्हासें अथे धयादीगु खः। प्रधानमन्त्री भट्टराईनं धयादिल 'प्यालेष्टाइनी जनताया स्वतन्त्र राष्ट्रया मागयात नेपाःया समर्थन दु।'
संचारकर्मीतलिसे खँ ल्हायेगु झ्वलय् वय्कलं भारतय् वनेमाली धकाः न्यूयोर्कय् वयागु मखु धकाः नं धयादिल।