'सत्य निरुपणं यायेमाःगु सरकारपाखें यायेत्यन'

येँ(सन्ध्या टाइम्स)/एकीकृत माओवादीया अध्यक्ष प्रचण्ड व राष्ट्रिय मानवअधिकार आयोगया दुजःतय् दथुइ थौं सुथय् सहलह जूगु दु। इमिसं सत्य निरुपण तथा मेलमिलाप आयोगया माध्यमं यायेमाःगु ज्या सरकारं यायेत्यन धकाः माओवादीया अध्यक्ष प्रचण्डया ध्यानाकर्षण यानादीगु खः। माओवादीया केन्द्रीय कार्यालयय् जूगु उगु सहलह ज्याझ्वलय् प्रचण्डं मानव अधिकारया वर्तमान अवस्थाया बारे जिज्ञासा तयादीगु खः।
सत्य निरुपण तथा मेलमिलाप अयोग व बेपत्ता खोजबिनसम्वन्धी आयोगया बारे नं सहलह जूगु उगु इलय् आयोगया दुजःतय्सं सरकार गठन याये न्ह्यः माओवादी व मधेसी मोर्चाया दथुइ द्वन्द्वकाल व मधेस आन्दोलनया झ्वलय् जूगु मानव अधिकार उल्लंघनया घटनाय् स्वापू दुगु मुद्दा लित कायेगु धकाः याःगु सहमतियात कयाः असन्तुष्टि प्वंकूगु खः।