देउवापक्षं देय्न्यंकं आन्दोलन याइगु

येँ (सन्ध्या टाइम्स)/नेपाली कांग्रेसया वरिष्ठ नेता शेरबहादुर देउवा पक्षधरं पार्टीया संस्थापन पक्षया निर्णय विरुद्ध देय्न्यंकं आन्दोलन याइगु जूगु दु ।

थौं देउवा निवास भुइजःसिइ च्वंगु देउवा पक्षया केन्द्रीय नेतातय्गु बैठक च्वनाः पार्टीया संस्थापन पक्षं भातृ संगठनयात विघटन याःगु विरुद्ध देय्न्यंकं हे आन्दोलन यानाः नेतृत्वयात दबाव बीगु नितिं सहलह ब्याकूगु खः।
पार्टीया केन्द्रीय ज्याकू सानेपाय् भातृ संगठनया कार्यकर्ता व नेतात आमरण अनसन च्वनाच्वंगुयात ऐक्यबद्धता प्वंकाः आः अज्वःगु हे कथं देय्न्यंकं आन्दोलन यायेगु रणनीति दयेकूगु दु धकाः कांग्रेसया छम्ह नेतां जानकारी बियादीगु दु ।

पार्टी सामूहिक नेतृत्वय् वने धुंकूगु अवस्थाय् गबलय् तक संस्थापन पक्षं पेलेयानाः वनी अबलय् तक हे आन्दोलनयात तीव्र गतिं न्ह्याकेगु विषययात कयाः नं देउवा पक्षधर नेतातय्गु दथुइ सहलह जूगु दु धकाः सूत्रं धाःगु दु। कांग्रेसया सभापति सुशील कोइरालां प्यंगू भातृ संगठन विघटनया घोषणा यासें प्रस्ताव हयेवं नेपाली कांग्रेस दुने ल्वापु तच्वयावःगु खः ।

अनसन हास्यास्पदः सभापति कोइराला
नेपाली कांग्रेसया सभापति सुशील कोइरालां भातृ संगठन विघटन विधान कथं हे जूगु दावी यानादिसें अनसन च्वंगु 'हास्यास्पद' खः धयादीगु दु। थौं नेपाल नाई संघया स्वक्वःगु राष्ट्रिय सम्मेलनया उलेज्या यायेगु नितिं वीरगंजय् झायादीगु इलय् बाराया सिमराय् संचारकर्मीतलिसे खँल्हासें वय्कलं अथे धयादीगु खः ।

सभापति कोइरालां धयादिल 'विघटन यायेगु पार्टी सभापतिया अधिकारया खँ खः, लोकतान्त्रिक निर्णय लित कायेमाःगु माग यानाः अनसन च्वंगुलिं कार्यकर्ताया दथुइ बांलाःगु म्यासेज वनीमखु ।'

प्रचण्ड व कोइरालाया दथुइ सहमति
थःथःगु पार्टीया हे आन्तरिक कारणं यानाः ज्यामछिंगु अवस्थाय् लानाच्वंपिं एकीकृत माओवादीया अध्यक्ष प्रचण्ड व कांग्रेसया सभापति सुशील कोइरालाया दथुइ शान्ति प्रक्रिया पूवंकेगु नितिं याकनं हे प्रमुख दलतय्गु बैठक सःतेगु धकाः सहमति जूगु दु ।

कोइराला निवास महाराजगंजय् प्रचण्ड वनाः थौं सुथय् याःगु भेटवार्ताय् अथे निम्ह नेताया दथुइ सहमति जूगु खः। भेटवार्ताया झ्वलय् प्रचण्डं लडाकु पुनवर्गीकरण यायेगु ज्या तत्काल सुरु मयात धाःसा थःपिंसं घोषणा यानागु ४५ न्हुया दुने शान्ति प्रक्रिया पूवंकेत थाकुइगु जुयाः ग्वहालि यायेत इनाप यानादीगु खःसा कोइरालां धाःसा शान्ति व संविधानया नितिं प्रतिपक्षय् हे च्वनाः रचनात्मक भूमिका म्हितेगु नापं लडाकु समायोजनया सवालय् ल्याः, दर्जा, मोडालिटी व राहतया प्याकेजय् सहमति मजुइकं रिग्रुपिङया ज्या न्ह्याकेगु पक्षय् थःपिं मदु धकाः धयादीगु खः ।