देउवाया वैठक वहिष्कारं पिहांवइगु समस्या

म्हीग नेपाली कांग्रेसया केन्दि्रय समितिया वैठक सताः भातृ संगठनत विघटन यायेगु खँयात कयाः सहलह ब्याकेगु धाःसां स्थिति सहलह स्वयाः संस्थापन पक्ष व देउवा पक्षया दथ्वी आरोप प्रत्यारेपय्हे ई वन । संस्थापन पक्षं महामन्त्री प्रकाश मानसिंहं उगुहे प्रस्तावया रुपय् न्ह्यःने हःगु भातृसंगठनतय्त विघटन यायेगु खँय् अडान कयाच्वनसा शेरवहादुर देउवा पक्षं उकिया विरोध यानाः संस्थापन पक्षयात ख्याच्वः वीगुली ई छ्यलेगु यात । तर संस्थापन पक्षं प्रस्ताव लितकयाः देउवापक्षयात तंमचायेकेगु ज्या याइधइगु अप्वः केन्दि्रय समितिया दुजःपिनिगु अनुमान विपरित संस्थापन पक्षं वहुमतया ध्वांस वियाः देउवा पक्षयात हाथ्या वियां त्वःतल । वहुमतं संस्थापन पक्षया प्रस्ताव पारित यानां त्वतल ।

उगु प्रस्ताव पारित जुइवं आः देउवा पक्षया वहुमत दु धयातःगु भातृसंगठनत नेपाल तरुण दल, महिला संघ, आदिवासी जनजाति संघ व प्रजातान्त्रिक सेनामी संघयात अवधि फुत धाःसां खारेज याइगु जुल । देउवा पक्षं व्यूगु हरेक ख्याच्वःयात संस्थापन पक्षं गम्भीररुपं मकासे वहुमतया ख्वालं देउवापक्षयात पेले यानाः हे न्ह्याः वनेगु मनस्थितिं अथ्य याःगु खः । आः प्रत्येक भातृसंगठनया नामय् संस्थापन पक्षया थः मनूतय्गु तदर्थ समिति दयेकाः न्ह्याः वनीगु करीव करीव निश्चित जूगु दु । देउवाया धापूकथं भातृसंगठनत महाधिवेशनया माध्यमं वःगुलिं विघटन यायेगु गैर प्रजातान्त्रिक खः । वरु महाधिवेशनया न्हि क्वछिनाः उगुहे पुचःयात विस्तार यानाः महाधिवेशन तयारी समिति दयेकाः न्ह्याःवनेमाः । तर संस्थापन पक्षं सहलह दयेकाः न्ह्याः वनेगु पल्सा वहुमतया ध्वास विया देउवापिन्त पेलेयानाः हे वनेगु धारणा न्हापाहे दयेका तये धुंकूगुलिं देउवापक्षया लाख ख्याच्व व विरोधया वावजुद नं संगठन विघटन यायेगु प्रस्तावयात पारित यानां हे त्वःतल ।

थथ्य जवरजस्ती प्रस्ताव पारित यायेवं देउवा पक्षं उगु केन्दि्रय समितिया वैठकहे वहिष्कार यानाः पिहां वनाव्यूगु दु । थुकियात संस्थापन पक्षं सामान्यरुपं काःसां देउवापक्षं संस्थापनया थुगु तानाशाही व गैर प्रजातान्त्रिक प्रवृत्तिया विरुद्ध न्ह्याः वनेगु मनोस्थिति नापं दयेके धुंकूगु दु । देउवाया पक्षया पकडय् दुगु भातृसंगठनत संस्थापन पक्षय् वनेवं आः देउवा पक्षं नं संस्थापनपक्षयात थःगुहे पहकथं लिसः वीगु ग्वसाः ग्वयाच्वंगु दु । संस्थापनपक्षं दयेकीगु तदर्थ समितिया समानान्तर समिति दयेकाः न्ह्याः वनेगु तयारी याःगु दु । थुगु कथं नेपाली कांग्रेसया भातृसंगठनत निगू पुचःया निथ्वः निथ्वलं ज्या याइगु पक्का पक्की खः ।
नेपाली कांग्रेसं प्रजातान्त्रिक परिपाटी व प्रकृया त्वःतल धकाः भातृ संगठनया पदाधिकारी व उकिया दुजःपिसं द्वपं वियावयाच्वंगुयात देउवाया थुगु वहष्किारं न्हूगु स्थिति सृजनायाइगु जक मदुला धकाः मनूतय्सं न्ह्यसः नापं तयेगु यानाहःगु खः । निगू पक्षया थःथःगुहे ग्वसाः व पहलय् मुंज्यात तयाः न्ह्याः वनाच्वंगु स्वये नेपाली कांग्रेस गन आः पार्टी विघटनया लँपुइ जक वनीगु मखुला ?

More Stories Like this