टिके प्रणाली हाकनं न्ह्याकल : देउवा

येँ (झीगु स्वनिगः)

कांग्रेसया वरिष्ठ नेता शेरबहादुर देउवां भातृ संगठन विघटन याःगु निर्णय नं पार्टीइ हाकनं छकः टिके प्रणाली सुरु जुल धकाः तिप्पणी यानादीगु दु । भातृ संगठनयात विघटन याःगु विरुद्ध पार्टीया केन्द्रीय ज्याकू सानेपाय् आमरण अनसन च्वनाच्वंपिं कांग्रेसया कार्यकर्तातय्त म्हिगः बुधवाः नापलाये धुंकाः याःगु पत्रकार सम्मेलनय् नेता देउवां अथे धयादीगु खः । कांग्रेसया प्यंगू भातृ संगठन बहुमतया आधारय् अल्पमतयात वास्ता मयासे केन्द्रीय कमिटीं विघटन याःगु खँ न्ह्यथसें वय्कलं धयादिल 'जिपिं थ्व अप्रजातान्त्रिक निर्णयाय विरोधय् दु । थुकिं यानाः कांग्रेस दुने हाकनं छकः टिके प्रथा सुरु जूगु दु ।' भातृ संगठनयात भंग याःगु धैगु पार्टी एकीकरणया इलय् याःगु सहमतिया भावना अःखः खः धयादिसें कांग्रेसया बरिष्ठ नेता शेरबहादुर देउवं धयादिल 'थुकिं यानाः अबलेया सहमतियात न्हुयाः छ्वयेगु ज्या जूगु दु ।'