संस्थापन पक्ष व असन्तुष्ट पक्षया ब्यागलं ब्यागलं बैठक

'भातृ संगठन कब्जा यायेगु दाउ’

येँ (झीगु स्वनिगः)

नेपाली कांग्रेसया संस्थापन पक्षं भातृ संगठनत केन्द्रीय कमिटीया बहुमतया आधारय् विघटन यायेवं बरिष्ठ नेता शेरबहादुर देउवा पक्ष आक्रमक रुपं प्रस्तूत जूगु दु । कांग्रेसया विघटन याःगु प्यंगू हे भातृ संगठनय् देउवा पक्षया बहुमत दुगुलिं गुगु नं हालतय् तदर्थ समिति दयेकाः अधिवेशनया माध्यमं न्हूगु नेतृत्व थःपिनिगु पक्षय् हयेगु संस्थापन पक्षया दाउ खःसा देउवा पक्षं नं थःपिनिगु पक्षय् दुगु भातृ संगठनयात विघटन मयाकूसे आःया नेतृत्वं हे अधिवेशन यानाः न्हूगु नेतृत्व तकं थःपिनिगु अनुकुल हयेगु दाउ कयाच्वंगु खः धकाः कांग्रेसया नेतातय्सं धयाहःगु दु ।

सूत्रं धाः कथं म्हिगः हे थःथःपिनिगु दाउ कथं भातृ संगठन कब्जा यायेगु नितिं माःगु योजना दयेकेगु तयारी याःगु दु । थ्व हे झ्वलय् देउवा पक्षं आन्दोलन हे यानाः वनेगु धकाः तयारी याःगु दुसा उखे संस्थापन पक्षं नं न्ह्याकगु नं यानाः पार्टीया निर्णययात ताः कार्यान्वयन यानाः वनेगु रणनीति दयेकूगु दु । उकिया नितिं निगुलिं पक्षं ब्यागलं ब्यागलं कथं मुँज्या तकं च्वंगु दु ।