धनकुटाय् नेवाः महोत्सव

नेवाः पुचः ग्वसालय् ने.सं. ११३१ ञलागा पंचमी (भदौ ५ गते) कुन्हु धनकुटाय् नेवाः महोत्सव क्वचाल । नेवाः देय् दबूया नायः नरेश ताम्रकारं उलेज्या यानादीगु उगु महोत्सवय् प्रमुख जिल्ला अधिकारी श्रीकृष्ण श्रेष्ठया विशेष पाहाँ कथं व्वति दुगु खः । अथेहे नेपाली कांग्रेस, नेकपा (एमाले), एनेकपा माओवादीया जिल्ला नायःपिं व सशस्त्र प्रहरी नापं प्रहरीया डिएसपिपिनिगु नं व्वति दुगु खः ।

ज्याझ्वलय् थीथी नेवाः भेषभुषा, नेवाः नसात्वंसा नापनापं नेवाः साँस्कृति ब्वज्या न्ह्यब्वःगु खः । अथेहे येँपाखें वःगु राष्ट्रिय ज्यापु सांस्कृतिक कोषया पुचलं नं छगू नेवाः संस्कृति ब्वज्या न्ह्यव्वःगु खः ।

ज्याझ्वलय् मूपाहाँ नरेश ताम्रकारं संविधानसभां परिकल्पना याःगु नेवाः राज्य व नेवाः राज्य दुने च्वनीपिं नेवाःतय्गु हकहित व अधिकार नापं नेवाः राज्यपिने च्वनीपिं नेवाःतय्गु हक अकिार व पहिचानया विषयसं धनकुटाय् च्वनाः वयाच्वपिं नेवाःतय्सं बिचाः यायेमाःगु धयादिल ।

लिम्वुवान राज्य दुने लाःगु धनकुटाय् च्वनाः वयाच्वंपिं नेवाःतय्त नं उगु राज्य दुने थःगु हे नेवाः पहिचान व राज्य व्यवस्थाय् समानुपातिक प्रतिनिधित्व दयेमाःगु खँ नं वय्कलं न्ह्यथनादिल । अथेहे वय्कलं धनकुटाया नेवाःतय् दथुइ हे बिस्कं कथंया नेवाः भाय् दुगु व उगु भाय्या संरक्षण यायेत नं सकल धनकटावासी नेवाःतय्त इनाप यानादिल ।

More Stories Like this