सत्ता, सरकार व क्रान्ति

अमीर ताम्रकार

एकीकृत नेकपा -माओवादी) यात सत्ता ल्हातय् काइन, शस्त्रया मोह मत्वःतू जन सेनायात व्यागलं मतः आदि इत्यादी द्वपं वीगु यानावयाच्वंगु दु । विपक्षय् च्वनाच्वंपिं नेपाली कांग्रेस व एमालें तर्क विहिन आलोचनां माओवादी साइज म्हो यायेगु, वइत मछिंकेगु, वइत पेले यायेगु धाःसा यथार्थय् कांग्रेस व एमालेया साइज झनझन बागः पुट्के जुजुं वनाच्वंगु दु । थुमिगु पार्टीया राजनीतिक लाइन मदयाः विचाः सून्य जुजुं दिशाहिन रुपं न्ह्याः वनाच्वंगु दु । थुमिसं थःपिनिगु सोचय् परिवर्तन महल धाःसा वइगु चुनावय् थुपिं आम जनताया मिखां अज्ज अप्वः कुतुं वनीगु निश्चित खनेदु । सत्ता प्राप्ति राजनीतिक पार्टीया मू उदेश्य खः । विना सत्ता राजनीतिक उदेश्य पूवनी मखु । सत्ता प्राप्तीइं प्रत्येक राजनीतिक दलत्गु छगू जक उदेश्य जुइ । प्रत्येक राजनीतिक दलया आज्जुहे सत्ता प्राप्ती जुसिनि हानं माओवादीं सत्ता ल्हातय् काइन, सत्ता लाका काइन, सत्ताया नितिं सशस्त्र विद्रोह याइन आदि इत्यादी धायेगुया ल्यूने मात्रै जनतायात भ्रम वीगु खः । माओवादी सत्ता ल्हातय् काइगु पार्टी, अले कांग्रेस एमाले थें संसदीय दलत सत्ता ल्हातय् मकासे केवल भजन म्ये हालीगु पार्टी खः । थ्व सफेद झूठ धयाः कांग्रेस एमालें मात्रै जनताया भ्रम वियाः थःपिनिगु गलत व ई फुइ धुंकूगु मनसाययात हानं छक्वः प्रयोगय् हयेत स्वयाच्वंगु प्रष्ट दु ।
सत्ता प्राप्तीया न्हापांगु त्वाथः सरकार खः । गणतन्त्र, संघीयता, समावेशीकरण, धर्म निरपेक्षता लगायत वर्तमान परिवर्तनया संवाहक माओवादी जूगुहे कारणं संविधानसभाया चुनावय् माओवादीयात दकले तःधंगु पार्टीया दर्जा व्यूगु खः ।

उकियाहे कारणं गणतान्त्रिक नेपाःया न्हापांम्ह प्रधानमन्त्री नं माओवादी पार्टीया नायः प्रचण्डया नेतृत्वय् न्हापांगु गणतान्त्रिक नेपाःया गणतान्त्रिक सरकार दयेकेत ताःलात । तर छुं ज्या याये न्ह्यःहे प्रधानसेनापति कटवालया प्रकरणय् प्रधानमन्त्रीया पदं राजिनामा बीत वाध्य यात । कांग्रेस एमालें राष्ट्रपतियात बहः कयाः थःपिनिगु कायरताया प्रमाण विल । थुया लिपा वहुमतीय सरकारया नितिं एमालेया वरिष्ठ नेता माधव कुमार नेपाल व थुया लिपा माओवादीया हे ग्वाहालिं एमालेया नायः झलनाथ खनालया नेतृत्वय् सरकार दयेकल । खनालया राजिनामा लिपा सहमतिया सरकार दयेकेमफयेवं वहुमतीय सरकारया निति प्रधानमन्त्रीया उम्मेदवारया रुपय् डा. बाबुराम भट्टराईयात न्ह्यःने हःथें छगूहे चुनावं डा. भट्टराइ त्यानं त्यात । तर प्रधानमन्त्री पदय् डा. भट्टराई त्यायेवं डा. भट्टराई थःगु पूर्व अडानकथं न्ह्याः वनसा माओवादी पार्टीया न्वकु खः धयागु विचाः तक्कं मयासे पार्टीया नायः प्रचण्डनाप सहमति व सहकार्य यायां पार्टीया निर्णय व परिपार्टीयात तुकुचाया खुसिइ चुइकाः बहुमतया नामय् मनपरीइ कुहां वल ।
प्रधानमन्त्री डा. भट्टराइ माओवादीया पार्टीयात बाइपास यायां न्ह्याः वनेगु मनोस्थिति दयेका च्वंगु दु । सरकार गठनया नितिं ग्वाहालि याःगु व सरकारय् सहभागी मधेसी मोर्चायात गृह रक्षा संचार थें महत्वपूर्ण मन्त्रालयत लःल्हानाः समर्थन कायेत ताःलाःम्ह डा. भट्टराई व पार्टीया नायः प्रचण्डं पार्टीयात धों लानाः निर्णयहे मजूगु खँयात निर्णय कथंहे कन्टेनरया ताःचा लःल्हानागु धयाः पार्टीया अनुशासन व प्रकृयायात ध्याक्वय् वांछ्वयेगु ज्याया शुरुवात याःगु दु । आः छपलाः न्ह्याः वनाः जनयुद्धया इलय् लाकातःगु सामन्त व जमिन्दारतय्गु छेँ बुँ सम्पत्ति छगू समिति गठन यानाः लित वीगु प्रकृयाय् दुहां वंगु दु । थ्व मात्रै सरकारय् च्वनेगु व विपक्षीतय्गु म्हुतुप्वाः तिकेत जक थुगुकथंया पार्टीया हित विपरित ज्या जुयाच्वंगुया पार्टी दुने जक मखु, मानव अधिकारवादी संघ संस्था व आम जनमानसं नापं असन्तोष प्वंकाच्वंगु दु । पार्टीया अनुशासन व हित विपरित जुयाच्वंगु थुज्वःगु कृयाकलाप याकनं वन्द यायेमाःगु खः । तर सुयागुं इसाराय् पार्टीया नायः व प्रधानमन्त्री डा. भट्टराईपिं दुब्वां वनाच्वंगु खनेदु ।

पार्टी प्रकृया अःखः वनाच्वंपिं पार्टीया नायः व न्वकुपिसं अमेरिका, भारत व प्रतिपक्षपिन्त न्ह्याक्कोहे लयेतायेगु ज्या याःसां नेपाली कांग्रेस व एमालें उकियात माःकथं सम्वोधन यानाच्वंगु मदु । अःखतं नेपाली कांग्रेस एमालें माओवादी पार्टी विरुद्ध विष वमन यायेगुली अप्वः गतिविधि यानावयाच्वंगु प्रष्ट खनेदयावःगु दु । माओवादीयात याकःबुकः यायेगु खँ, संविधान दयेकेहे मवीगु लगायत खँ प्रतिपक्षय् च्वनाच्वंपिसं माओवादीयात लचकतायात कमजोरी तायेकाः पेले यानाः हे वनेगु नीति न्ह्यःने यंकाच्वंगु प्रष्ट खनेदु । थुकिं सकारात्मक लिच्वः पिहां वइगु छुंनं कथंया सम्भावना खनेमदु । पार्टीयात बाइपास यानाः नेपाली कांग्रेस, एमालेनिसें भारत व अमेरिकायात नं प्रभावित यायेगु व डा. भट्टराईया प्रधानमन्त्रीत्वया सरकारं शान्तिप्रकृया नामय् सेना समायोजनया ज्यात थःगुहे ताःलं याकनं स्वयाः याकनं क्वचायेकेगु स्वयाच्वंगु दु । न्हापा धयावयाच्वंगु सम्मान जनकया खँ त्वःताः अपमान रुपंहे थजु प्रति पक्षतय्गु स्यावासी नयेत स्वयाच्वंगु स्पष्ट दु ।

झिदँया जनयुद्धया इलय् ल्होंगु मागत पूमवंनि । जनयुद्ध स्थगित जक जूगु खः, अन्त्यहे जूगु मखुनि । क्रान्ति न्ह्यानाहेच्वंगु दु, पूमवंनि । पार्टी दुने स्वंगू लाइनया दथ्वी जुयाच्वंगु संघर्षया उदेश्य नं थ्वहे खः । सरकारय् वनेवं प्रचण्ड व डा. बाबुराम भट्टराईया दथ्वी विद्यमान निगू लाइन छगू जुइवं ल्यं दनिगु मोहन वैद्य किरणया लाइन क्रान्तिकारी खः । कम्युनिष्ट पार्टीया ध्वांय् त्वःतेगु ज्याय् प्रधानमन्त्री डा. भट्टराईपिं सकृय जुइवं ताःचा प्रकरणं निसें न्ह्यःने वःगु समस्यायात समाधान यायेगु पल्सा वयकःपिं प्रतिपक्ष व विदेशीतय्त लयेतायेकेत थःपिनिगु शक्ति खर्च यानाच्वंगु दु । सिंगापुर व मलेसिया पार्टी नायःया भ्रमण लिपा वयाच्वंगु हिउपालं पार्टी दुने गम्भीर परिस्थिति सृजना जुयाच्वंगुयात मन्थर यायेगु ज्या त्वःताः वयकःपिं पार्टीया निर्णय विपरित सम्पत्ति लित वीत सकृय जुयादीत्यंगु दु । वइगु केन्दि्रय समितिया मुंज्याय् थुगु विषयलय् छलफल जुइसां लिच्वः छु पिहांवइ, धायेमफु । तर थःपिनिगु गल्तियात सुधार मयासे, थप समस्या सृजना यायेगुली व्यस्त जुलधाःसा परिस्थिति प्रतिकुल जुइगु अप्वः सम्भावना खनेदु । लिच्वः न्ह्याग्गुहे पिहां वःसां नेपाली क्रन्तिया ध्वांय् क्वछुइके मज्यू, क्वछीगु ज्या सुनां मयायेमा क्रान्तिया ध्वांय् त्वःतूपिन्त नेपाली जनतां क्षमा बीमखु । थुलि स्पष्ट दु ।

More Stories Like this