सचिव सरुवां न्ह्यःने हःगु शंका

एकीकृत नेकपा -माओवादी) या न्वकु व वर्तमान प्रधानमन्त्री डा. बाबुराम भट्टराई सचिवत सरुवा यायेमदैगु धयादीगु छवाः मवीकं उप व गृहमन्त्री विजयकुमार गच्छदारं गृहमन्त्रालयया छ्याञ्जे लिलामणी पौडेलयात चीका वयकःया थासय् थः मनू सुशिल जङ्ग राणायात हःगु दु । थ्व खँयात गच्छदार मन्त्रीपरिषदं पारित नं याके धुंकूगु दु । छवाः न्ह्यः जक छुंनं मन्त्रालयया सचिवतय्त लच्छिहे मदयेक सरुवा मयायेगु धकाः प्रधानमन्त्री डा. भट्टराई निर्णय याःगु खः । उकियात लागू यानाः क्यनेगु पल्सा उपप्रधान लिसें गृहमन्त्री विजयकुमार गच्छेदारं सचिव पौडेलयात सरुवा यायेगु प्रस्ताव तयेवं विना ताःहाकःगु छलफलहे मजुसे प्रस्ताव एकीकृत जुल । प्रधानमन्त्री डा. भट्टराइया निर्णय थन कमजोर सावित जुल व गृहमन्त्री गच्छदारया गलत प्रस्ताव पास यानाः सरकारं थःगु लाचारीपन क्यन । गृहमन्त्री गच्छदारं थ्व सरुवा प्रकृया भिंगु व बांलाःगु ज्याया नितिं धाःसां यथार्थय् वयकःया खँय् सुनांनं विश्वास याःगु मदु । छगू मखु छगू गलत ज्याया नितिंहे गृहमन्त्री गच्छदारं पौडेलयात सरुवा याःगु खः । तर थ्व खँयात मन्त्रीपरिषदय् छाय् सुनां नवायेमफुत ?

पौडेल जुइमा वा राणा निम्हं दँवदं प्रशासनिक ख्यलय् ज्या याना अनुभवी व्यक्तित खः । पौडेल असक्षम धकाः चीकेगु व राणा सक्षम धकाः तयेगुया छुंहे औचित्यता मदु । निम्हं सक्षम खः, अनुभवी खः । तर नं प्रधानमन्त्री डा. भट्टराईया निर्णय विपरित गच्छदार छाय् न्ह्यःने वल ? थुकिया वारे सुनां न्ह्यसः मतःगु धयागुहे वर्तमान सरकार मधेसवादीतय्गु पकडय् लानाच्वंगु व इमिगु छुंनं प्रस्तावयात इन्कार यायेगु हैसियत सुयाके मदु । मखुसा निर्णय यायेगु व उल्लंघन जुइगुयात सुनांनं सामान्यरुपं काइमखु । थुकिं यानाः प्रधानमन्त्रीया हैसियतय् नापं मनूतय्सं न्ह्यसः थनाहयेत वेर मदु । उपप्रंधान लिसे गृहमन्त्री विजयकुमार गच्छादरया चरित्र थीक मजू व वयकःपाखें विगतय् माक्को गलत ज्याखँत जूगु दु । वकयःया थौं तक्कया गतिविधि तसकं शंकास्पष्ट व भ्रष्ट कृयाकलापं जुयाच्वंगु स्वये वर्तमान सचिवया सरुवाय् नं भिंगु मनसायकथं मजुसे छुं मखु छुं गलत मनशायकथंहे याःगु अप्वःसिगु अनुमान दु । वयकः पाखे यक्को गैर कानुनी ज्यात नं जूगु हुइनाभुइना दु । भ्रष्ट चरित्रया व्यक्तियात गृहमन्त्रालय् थें अतिकं सम्वेदनशील व महत्वपूर्ण मन्त्रालय लःल्हानाः वर्तमान सरकारं गलत ज्याखँया शुरु याःगु दु व थुकिं प्रधानमन्त्री डा. भट्टराई व सरकार सहभागीतय्गु नं छविइ नापं बांमलाइगु स्पष्ट दु ।

गृहमन्त्रीया थुगु सरुवा प्रकरणं छुं गलत सन्देश जक प्रकृयाहेे मन्ह्या धकाः धायेफैमखु । छुं गलत उदेश्यं ज्वनाः थ्व ज्या याःम्ह गच्छदारया खास उदेश्य छुं खः सीकेत थाकुइ मखु । सचिव पौडेलयात चीकाः राणायात हःगुया मू कारण धयागु प्रहरी दुने तःधंगु लतय् निरिक्षक निसें कयाः उपनिरिक्षक तक्कया सरुवाया तयारी खः । प्रहरी प्रशासनय् थुगुकथंया सरुवा यानाः गृहमन्त्री गच्छेदारं छख्य प्रहरी प्रशासनय् थःगु पकड व प्रभाव दयेकेत स्वःगु दुसा मेख्य थुकिं करौडौया घुस नये दैगु ग्वसाः खः । थ्व खँयात कयाः पुलांम्ह सचिव पौडेल विरोध यायेवं हे गृहमन्त्री गच्छदारं वयकःयात चीकुगु खः । थ्व धयागु गृहमन्त्रालयया नितिं तसकं आपत्ति जनक खँ खः । तर गच्छदारयात थुगु ज्यां पनीगु सुनां ?

More Stories Like this