देउवा पक्षं केन्द्रीय समितिया बैठक बहिष्कार

भातृ संगठनत विघटन यायेगु प्रस्ताव पारित

येँ (झीगु स्वनिगः)

भातृ संगठनतय्गु कचवंयात कयाः म्हिगः नेपाली कांग्रेसया केन्द्रीय समितिया बैठक च्वंगु खःसा बैठक क्वचायेक न्ह्यःहे देउवा पक्षं बहिष्कार यानाः पिहांवंगु खः । पार्टीया ज्याकू सानेपाय् च्वंगु बैठकय् कचवंयात कयाः सहमतिइ वइगु खाय् संस्थापन पक्षं दावा याःसां नेपाली कांग्रेसया वरिष्ठ नेता शेरबहादुर देउवाया पक्षं धाःसा संस्थापन पक्षं थःपिनिगु पूर्वीय प्रस्ताव लित मकाल धाःसा छु नं हालतय् सहमति मयायेगु अडान तःगु खः । वंगु केन्द्रीय समितिया बैठकय् महामन्त्री प्रकाशमान सिंहं म्याद फुइ धुंकूगु भातृ संगठनत तरुण दल, महिला संघ व आदिवासी जनजाति संघ लगायत प्यंगू भातृ संगठनतय्त विघटन यायेगु प्रस्ताव न्ह्यःने हःगु खः ।

थुकियात कयाः नेपाली कांग्रेसया वरिष्ठ नेता शेरबहादुर देउवाया पक्षं धाःसा उगु प्रस्तावयात तत्काल अस्वीकार याःगु खः । उखे संस्थापन पक्षं उगु प्रस्तावयात छु नं हालतय् पारित याकाः तदर्थ समिति दयेकाः न्ह्याःवनेत स्वःगु खः । तर देउवा पक्षं बहुमतया ल्याखं उगु प्रस्ताव पारितयात धाःसा पार्टीदुने गम्भीर स्थिति सृजना जुइफूगु व संस्थापन पक्षं उकिया तःधंगु मू पुलेमालीगु ख्याच्वः ब्यूगु खः । संस्थापन पक्षं तत्काल महाधिवेशन मयायेगु व न्हि तकं क्वःछीत तकं तयार खनेमदु । संस्थापन पक्षया पेले यानाः न्ह्यःने वनेगु मनस्थितियात कयाः म्हिगः भातृ संगठनया पदाधिकारी व कार्यकर्तातय्सं पार्टीया कार्यालय सानेपाय् रिले अनसन नापं च्वंगु खः ।

लिसें भातृ संगठनत नापं स्वापू दुपिंसं पार्टीया नेतातय्गु आलोचना याःगु दु । नेपाली कांग्रेसं लोकतान्त्रिक पद्धति व विधि त्वःतूगु व उकियात पालन यायेमाःगु मखुसा पार्टी इतिहासया विषय वस्तु जुइगु तकं धाःगु दु । उखे देउवा पक्षं चुनावया प्रक्रिया वःगु भातृ संगठनतय्त विघटन यायेमज्यूगु बरु महाधिवेशनया न्हि क्वःछिनाः अधिवेशनया तयारी समितिया रुपय् न्ह्याकेमाःगु धाःसां संस्थापन पक्षं मात्रै विघटन यानाः आःयात थःमनूत तयाः तदर्थ समिति दयेकेगु मनस्थिति दयेकूगु खः । म्हिगःया केन्द्रीय समितिइ छलफल यानाः ज्यंकेगु धाःसां सहमतिया लकस मदयेवं संस्थापन पक्षं बहुमतया आधारय् प्रस्ताव पारित याःगु खः । थुकिं पार्टी विभाजन तकं जुइफैगु धाःगु दु ।