महान्यायाधिवक्ता प्रधानयात संघर्ष समितिं हन
नेवाः भाषिक व जातिय आन्दोलनया न्ह्यलुवाः मुक्ति प्रधान महान्यायाधिवक्ता जुयादीगुलिं नेवाः स्वायत्त राज्य मंकाः संघर्ष समितिं वय्कःया हंगु दु ।
येँया क्षेत्रपाटी पार्टी प्यालेसय् मंगलवाः जूगु छगू ज्याझ्वःया दथुइ संघर्ष समितिया नायः डा. चुन्दा बज्राचार्यं सिन्ह तिकाः व खाडा क्वखायेकाः वय्कःयात सम्मान यानादीगु खः । अथेहे संघर्ष समितिया फुक्क घटकया प्रतिनिधितय्सं नं वय्कःयात खाडां क्वखायेकाः सम्मान याःगु खः ।
ज्याझ्वलय् सम्मानित जुयादीम्ह प्रधानं थः महान्यायाधिवक्ता जूसां नेवाः लगायत आदिवासी जनजातितय् अधिकार नाप छुं नं कथंया 'कम्प्रोमाइज' मयायेगु धयादिल । वय्कलं भाषिक व जातिय खँ राजनीति नाप स्वापु दुगुलिं झीसं नेवाः स्वायत्त राज्य प्राप्तिया निंतिं न्ह्याः वनाः च्वनेमाःगु धयादिल ।
नेवाः देय् दबूया संरक्षक लक्ष्मण राजवंशीं महान्यायाधिवक्ताया कार्यकालया सफलताया भिंतुना बियादिसें आः वय्कः समग्र राष्ट्रया प्रतिनिधि जूगुलिं बांलागु ज्या यानाः क्यनाः तयेत इनाप यानादिल । अथेहे ज्याझ्वलय् सभासद् बुद्ध साय्मि व राजकाजी महर्जनं महान्यायाधिवक्ता जूगु इलय् नेवाःतय्त सामाजिक न्याय बिइकेगु पाखे नं ध्यान बिइत इनाप यानादिल ।
ज्याझ्वलय् संघर्ष समितिया फुक्कं घटकया दुजःतय्सं थःथःगु नुगः खँ प्वंकूगु खः । नेवाः देय् दबूया नायः नरेश ताम्राकारं लसकुस यानादीगु ज्याझ्वः संघर्ष समितिया नायः ब्रजाचार्यं सुभाय् बियादीगु खः ।
