'पेलेयायेवं बहिस्कार' याइगु

देउवा पक्ष आमरण, संस्थापन पक्ष रिले अनसनय्

येँ (सन्ध्या टाइम्स)/नेपाली कांग्रेसया भातृ संगठन विघटन यायेगु ला कि मयायेगु धइगु खँययातकयाः ब्वलंगु विवादं लिपा संस्थापन पक्ष व वरिष्ठ नेता शेरबहादुर देउवा पक्ष ब्यागलं ब्यागलं पार्टीया केन्द्रीय ज्याकुथिइ अनसन च्वंगु दु। संस्थापन पक्षया कार्यकर्तात भातृ संगठन विघटन यानाः न्हूगु हे तदर्थ समिति दयेकाः अधिवेशनया माध्यमं न्हूगु नेतृत्व ल्ययेमाः धकाः पार्टी केन्द्रीय कार्यालय पिने पाल ग्वयाः म्हिगः निसें रिले अनसन च्वंगु दु ।

उखे वय्कःपिं रिले अनसन च्वने न्ह्यः हे भातृ संगठन विघटन याये मजिउगु व वर्तमान केन्द्रीय समितिपाखें हे अधिवेशन यानाः न्हूगु नेतृत्व ल्ययेमाः धइगु माग यासें बरिष्ठ नेता शेरबहादुर देउवा पक्षया कार्यकर्तात पार्टीया केन्द्रीय ज्याकुथिइ आमरण अनसन च्वंगु खः ।

देउवा पक्षधर भातृ संगठनया नेतात महेन्द्र यादव, अम्बिका बस्नेत, इन्द्रबहादुर गुरुङ, नविन चित्रकार लगायतयापिं थौं अनसन च्वंच्वंगु दु। नेपाली कांग्रेसया भातृ संगठनत आदिवासी जनजाति संघ, नेपाल तरुण दल, नेपाल महिला संघ, नेपाल विद्यार्थी संघ लगायतयात विघटन यानाः तदर्थ समिति दयेकाः अधिवेशनया माध्यमं न्हूगु नेतृत्व ल्ययेगु धकाः संस्थापन पक्षं प्रस्ताव पार्टीया केन्द्रीय समितिइ यंकेवं पार्टी दुने विवाद तच्वयाः वःगु खः। थ्व हे दथुइ कांग्रेसया नेता कृष्ण सिटौलां मध्यमार्गी लँपु नालाः वनेगु नितिं थौं सुथय् केन्द्रीय समितिया बैठक न्ह्यः याःगु वार्ता विना निष्कर्ष क्वचाःगु दु। निगुलिं पक्षं थःथःगु अडान कायम याःगुलिं वार्ता विना निष्कर्ष क्वचाःगु खः ।

थ्वया दथुइ कांग्रेसया भातृ संगठनया बारे थौं हे क्वचायेकेगु धकाः केन्द्रीय समितिया बैठक केन्द्रीय कार्यालय सानेपाय् जूवनाच्वंगु दु। न्हिनय् १ बजे सःताः तःगु उगु बैठकय् उपस्थिति जुइत नेतात साढे १ बजे तक वयेगु क्रम जारी हे जुयाच्वंगु दु। थौंया बैठकया नितिं निगुलिं पक्षं थःथःगु कथं तयारी यानाः वःगु दु। संस्थापन पक्षं बहुमतया आधारय् निर्णय यानाः वनेगु तयारी याःगु दुसा देउवा पक्षधरं यदि बहुमतया नामय् पेलेयायेगु ज्या जुल धाःसा बैठक हे बहिस्कार यायेगु तयारी याःगु दु।
सूत्रं धाः कथं देउवां पक्षं भातृ संगठनत विघटन याये दइमखु धकाः खँ तइगु अले उकियात संबोधन यायेगु ज्या मजुल धाःसा बैठक हे बहिस्कार यानाः पिहां वयेगु नापं पार्टी दुने हे भद्र व अनुशासित कथं आन्दोलन यानाः वनेगु तयारी याःगु दु ।

सभापति सुशील कोइरालायात धाःसा पार्टीया कार्यकर्तात तकं रिले अनसन व आमरण अनसन च्वंवःगुलिं निर्णय यायेत ज्या मछिनाच्वंगु धकाः धाःगु दु ।