प्रधानमन्त्री भट्टराई नं न्यूयोर्कय् छु छु यानादी?
येँ (सन्ध्या टाइम्स)/राष्ट्रसंघीय महासभाय् ब्वति कायेत १३ म्हेसिया नेतृत्व यानाः वंम्ह प्रधानमन्त्री डा. बाबुराम भट्टराई थौं सुथय् न्युयोर्क थ्यंगु दु। वय्कः थौं स्थानीय ई कथं न्हिनसिया ३ ताः इलय् जोन एफ. केनेडी अन्तर्राष्ट्रिय विमानस्थल थ्यंगु खः। उगु पुचःयात राष्ट्रसंघीय नियोगया स्थायी प्रतिनिधि नापं दूतावासया अधिकारीतय्सं लसकुस याःगु खः। न्यूयोर्कय् महासभाया बैठक थनिंनिसें न्ह्याइ ।
प्रधानमन्त्री भट्टराईं वइगु शुक्रवाः संवोधन यानादीगु ज्याझ्वः दु। वय्कलं थौं नर्वेया प्रधानमन्त्री, क्युबाया विदेशमन्त्रीयात नाप लानादी। अथे हे प्रधानमन्त्री भट्टराई नं वासिङटन पोष्टयात अन्तर्वार्ता बियादीगु दु। अथे हे स्थानीय ई कथं थौं हे बहनी साढे ६ बजे वय्कः हायात होटलया रिसेप्सनय् सहभागी जुयादी। कन्हय् भुटानया प्रधानमन्त्री, श्रीलंका व बोलिभियाया राष्ट्रपतियात नापलानादी। सुथय् राष्ट्रसंघया महासचिव बान कि मुननाप ब्रेकफास्ट यानाः बहनी अमेरिकी राष्ट्रपतिलिसे ब्यलि भ्वजय् सहभागी जुयादी। उकथं प्रधानमन्त्री भट्टरार्इं विहिवाः स्लोभानियाया राष्ट्रपतिलिसें भेटवार्ता यानादी ।
उखुन्हु हे कनेक्टिकटय् थःगु बाल्यकालया गुरुयात नापलानादी। वइगु शुक्रवाः वय्कलं फिनल्याण्डया राष्ट्रपति, मालदिभ्सया उपराष्ट्रपति, मौरिससया प्रधानमन्त्री व अमेरिकाया उपमन्त्रीलिसें भेटवार्ता यानादी। उकुन्हु हे न्युस्कूलय् वय्कलं मार्क्सवाद सम्वन्धी प्रवचन बियादीगु ज्याझ्वः नं दु।
शुक्रवाः महासभाया न्हापांगु सत्रय् संबोधन लिपा चान्हय् १२ बजे वय्कः नेपालय् लिहां झायादी ।
