तःमुँज्या ताःलाकेत साहित्यकारतय् थीथी ज्याझ्वः

ख्वप (सन्ध्या टाइम्स)/वइगु कउलाथ्व द्वादशि व त्रयोदशि निन्हुयंकं ख्वपया यःसिंख्यलय् जुइगु स्वीछक्वःगु नेपालभाषा साहित्य तःमुँज्याया लागिं दुथ्याकेगु रचना परिमार्जित यायेत बागीश्वरी उच्च माविइ साहित्य गोष्ठी जुल। तःमुँज्या मू गुथिया नायः कान्छा बासुकला मूपाहां जुयादीगु उगु ज्याझ्वलय् एल. के. सुन्दर, कुम्हाः कृष्ण, के. पी. छुस्याकी, राजकुमार लघु, सिर्जना सैंजू, हरिसुन्दर छुकां लगायतया च्वमितय्सं थःपिनि च्वसु न्यंकादीगु खः ।

युवा साहित्य गोष्ठीया ग्वसालय् जूगु उगु ज्याझ्वः नायः आमोद उलकया सभापतित्वय् जूगु खः। ज्याझ्वलय् स्वीछक्वःगु नेपालभाषा साहित्य तःमुँज्याया ग्वसाः खलःपाखें नायः कुमार चवालं न्ववानादीगु खःसा दुथ्याःगु साहित्य बारे वक्तातय्सं समीक्षा नं याःगु खः। थज्याःगु हे साहित्यिक ज्याझ्वःत यानाः तःमुँज्याय् परिमार्जित साहित्य जक पाठ याकेगु खँ धाःगु दु ।