हत्या याःम्ह तरुण दलया दुजः ज्वन
येँ (सन्ध्या टाइम्स)/एमाले युवा संघया कार्यकर्ता संजय लामायात गोलीं कयेका स्याःम्ह नेपाली कांग्रेस तरुण दल चितवनया दुजः चन्द्र बहादुर लामायात प्रहरीं ज्वंगु दु। थौं नवलपरासीया छगू गामं लामायात ज्वंगु खः। वंगु भदौ १० गते कविलास गाविसया घमाउने लागाय् एमालेया कार्यकर्ता लामायात गोलीं कयेका स्यानाः बिउगु खः। संजय लामायात स्यानाः बिउगु घटनायात कयाः तरुण दलया चितवनया अध्यक्ष शिव पौडेल नापं १५ म्हेसित किटानी जाहेरी यानातःगु खः ।
किटानी जाहेरीया हे लिधंसाय् उगु हत्याकाण्डय् संलग्न जूपिं धया तःपिं तरुण दलया चितवनया अध्यक्ष शिव पौडेल, साजन गुरुङ, प्रमिश राई व राजु गुरुङयात धाःसा छुं दिं न्ह्यः ज्वंगु खः। पौडेलं चन्द्रबहादुर नापं मेपिं निम्हेसिनं गोलीं कयेका लामायात स्यानाःगु खः धकाः प्रहरीयात बयान बी धुंकूगु दु ।
