तोखाया ल्वापुइ दोषीयात कारवाहीया माग

येँ (सध्या टाइम्स)/तोखाय् छवाः न्ह्यः जूगु भीषण ल्वापुइ घाःपाः जूपिंसं उगु घटनाया वास्तविक दोषीयात कारवाही यायेमाःगु माग याःगु दु। म्हिगः नेपाल बार एशोसियसनया हलय् छगू पत्रकार सम्मेलन यासें घटनाय् घाःपाः जूपिं विजय श्रेष्ठ, केदार श्रेष्ठपिंसं उगु माग याःगु खः। सरस्वती गाविस व चण्डेश्वरी गाविसया मनूत वयाः थःगु छेँय् आक्रमण याःगु कारणं उमित कारवाही यायेमाः धकाः छुं न्हि न्ह्यः जक नारायण श्रेष्ठं रिपोर्टर्स क्लबय् याःगु पत्रकार सम्मेलनया प्रतिवाद यायेकथं घाःपाः जूपिं मनूतय्सं नं मेगु हे पत्रकार सम्मेलन यासें अन उगु घटना जूवंगु मखुसें उत्तेजित जनमानसं हे अन अप्पां कयेकूगुलिं उगु घटनाया दोषी अपराधीयात छेँय् संरक्षण यानातःम्ह अबुम्ह नारयाण श्रेष्ठया हे जुइगु दावी याःगु खः ।

रिपोर्टर्स क्लबय् अभियुक्त राम श्रेष्ठया अबु नारायण श्रेष्ठं पत्रकार सम्मेलन यासें थः काय अपराधी खःसा वयात जक ज्वनाः कुनेगु स्वयेमाःगुली थःगु छेँ, थःगु गाडी व मोटरसाइकल तकं तोडफोड याःगु कारणं उकिया क्षतिपूर्ति विपक्षीतय्सं बीमाःगु माग याःगु खः। घाःपाः जूपिं केदार श्रेष्ठ, विजय श्रेष्ठपिंत क्षतिपूर्ति पुइकेगु कथं अन न्ववाःगु खँय् आपत्ति प्वंकुसें घाःपाः जूपिंसं आः थुकिया अन्तिम समाधान धइगु स्थानीय जनता जानाः प्रहरी चौकीइ कुनातःपिंत याकनं कारवाही याकेगुली हे जक चूलाइगु खँ धाःगु दु। निगुलिं पक्ष तयाः उचित समाधान लुइकेगु कुतः जुइगु खँ सर्वदलीय संयन्त्रया समीर श्रेष्ठं कनादिल ।