सहमति व सहकार्यया खँ

कृष्ण प्रजापति

थौंकन्हय् देशय् सहमति व सहकार्यया नारा तसकं चले जुयाच्वंगु दु। अथे खःसां माःगु इलय् थीथी राजनीतिक पार्टीतय् दथुइ जुइगु सहमति लिउने लानाः आपालं नोक्सान नं फयेमालाच्वंगु स्थिति नं दु। खास याना नेपाली राजनीतिक ख्यलय् न्हिया न्हिथं शान्ति, सहमति व न्हूगु संविधान निर्माण यायेगु नामय् सत्ताया जक ताक स्वयेगु प्रबृत्ति ब्वलना च्वंगुलिं यानानं आतकं वास्तविक रुपं सहमतिय सरकार नं नीस्वने मफुगु खः ।

लिसें थीथी राजनीतिक दलत नापं सत्तासिन राजनीतिक दलत सहकार्य यानाः न्ह्याः वने मफइगु वातावरण ब्वलनाच्वंगु खः। देशय् नकतिनि जक गणतन्त्र स्थापना जूगु व न्हूगु संविधान दयेके ल्यं दनिगुलिं थ्व ई धइगु राजनीतिक पार्टीतय् दथुइ एकता, इमान्दारीता व निष्पक्षता क्यनाः पारदर्शीपूर्वक न्ह्याः वनेमाःगु ई नं खः। अथे खःसां थन सत्ताय् थ्यंपिं राजनीतिक पार्टीत चाहे व कम्युनिष्ट पार्टी हे छाय् मजुइमाः मेपिंत साथ कयाः न्ह्याः वनेमाः धइगु धारणा तकं तःगु खनेमदु। अथे जुयाः नं छगू भेटघाट ज्याझ्वलय् राष्ट्रपति डा. रामबरण यादवं डा. बाबुराम भट्टराईयात वय्कःपाखें आपालं आशा कयागु न्ह्यथनादिसें आः मेमेगु राजनीतिक पार्टीया नं ग्वाहालि कयाः ज्या यायेत सल्लाह बियादीगु खः ।

देशय् छगू हिउपाः वःगु दु। न्ह्यागु हे देशय् नं हिउपाः लिपा छगू गति प्राप्त जुइ। झीगु देशय् नं ताः ई तक अथें लानाच्वंगु उन्नतिया गतियात आः दूत गतिं न्ह्याकेमाःगु आवश्यकता दु। झिंनिदँ झिंस्वदँ तक माओवादी जनयुद्धया कारणं खाली स्यं जकं स्यनाच्वंगु थ्व देशयात आः धमाधम अग्रगामी दिशापाखे यंकेगु झीगु थौंया माग व आवश्यकता खः। न्ह्याबलें नं समाज धइगु असल व्यक्तित्वपाखें हे चले जुयाच्वनीगु खः। तर झीगु देशय् परिवर्तन लिपा थीथी राजनीतिक नेतात ला तयार जुल तर असल व्यक्तित्वत धाःसा तयार मजू। भारतय् महात्मा गान्धी व चीनय् माओत्से तुङ थेंज्याःपिं राष्ट्रिय व्यक्तित्व कथं स्पष्ट ढंगं खने दयेकावःपिं नेतातय् अभावया कारणं नं थौं झीगु देय् अन्यौलय् लानाच्वंगु खः। थन न फुक्कं पार्टीयात मान्य नेता हे तयार जुयावःगु दु, न त अज्याःम्ह नेता तयार यायेमाः धइगु हे मान्यता राजनीतिक पार्टीतय्सं बिचाः याःगु दु। थःपिंसं जक सत्ता कायम यानातयेगु हे थ्व इलय् पार्र्टीतय्सं ध्यान तयाच्वंगु दु। २०४७ सालय् विश्वय् हे उत्कृष्ट धयातःगु संविधान तयार याःपिं नेतात थौंया इलय् वयाः संविधान तयार याये मफुगु कारणं लज्जित जुयाच्वने माःगु कारण नं थथे हे राजनेताया नेतृत्व अभाव जूगलिं हे जक नं खयेफु ।

थ्व इलय् ल्याय्म्ह पुस्तां थःगु दायित्व, राजनीतिक कर्तब्य व अहिंसात्मक आन्दोलनया मर्म थुइकाः ज्या याना क्यनेगु खत धाःसा सहमति व सहकार्यया थुलि चर्चा यायेगु पाय्छि जुइफु। तर आतकं सहमति याकेगु व सहमतिया आधारय् सरकार चले यायेगु धाधां बहुमतिय आधारय् नीस्वंगु वर्तमान भट्टराई सरकारं नं यदि थःपिं हे जक ग्यसु ग्यंकेगु स्वयां मेपिंत वास्ता हे मयात धाःसा आः पार्टी दुनें विरोध व आलोचना न्यना च्वनेमाःथें कन्हय् निर्णय यायेत्यइगु इलय् तकं थःपिनि पार्टी व विपक्षी पार्टीतय् तच्वगु विरोधया सामना याये मालाः थ्व सरकार नं असफल जुइफुगु आपालं सम्भावनात दनि। आपत विपत वइगु इलय् हे विपक्षी व सत्तापक्ष मिले जुइमाःगु खः। ल्याय्म्ह पुस्ताया बः कयाः जूसां ज्या फक्व यायेमाःगु खः। तर थन ला न्ह्याक्वः हे सक्षमपिं खःसां राजनीतिक पार्टीया साथ व संगत मदुपिं जुइवं वयात वांछ्वयेगु, असक्षम साबित यायेगु अले वयात अन लाः थन लाः मदयेकाः छ्वयेगु प्रवृत्ति ब्वलनाच्वंगु दु। वास्तवय् उकिं नेपाली जनताया हीत धाःसा याइ हे मखु ।

सार्वजनिक संस्थाय् मनूत भर्ना यायेगु इलय्, राजनीतिक नियुक्ति यायेगु इलय् व थः ग्वाहालिमिपिंत उच्च दर्जाय् तये यंकेगु इलय् नं कन्हय् विवाद मवइगु कथं जक ज्या यायेमाःगु खः। देशय् म्हिगः म्हीग हे तिनि तःभुखाय् ब्वयाः आपालं मनूत त्रसित जुइमाःगु ई वल। थथे हे मनूत आँटे जुयाच्वंगु इलय् छु गज्याःगु कथंया राहत बीमाःगु खः वा पूर्वतयारी यायेमाःगु खः व नं सरकारं याना क्यनेमाः। मखुत धाःसा कन्हय् व स्वयां तच्वःगु प्राकृतिक प्रकोप वल वा विनाशकारी स्थिति वल धाःसा धाःसा अज्याःगु इलय् सहकार्यया वातावरण गथे यानाः दयेकेगु खः? आपत विपतया इलय् ग्वाहालि यायेगु, माःगु इलय् माःथें ल्याय्म्ह पुस्तापाखें ज्या याकेगु व नियमित रुपं न्हूगु पुस्तायात क्षति न्यूनिकरण सम्वन्धी थीथी कथंया तालिमत चले यानाः उमिगु हौसला ब्वलंकेगु ज्या जुया जुल धाःसा ल्याय्म्हतय् नं गौरव जुयाच्वनी। मखुत धाःसा राजनीतिक नारा, राजनीतिक सिद्धान्त, आस्था विचार व प्रेरणां नं न्हूगु पुस्ता तापाना वनेफु ।

राजनीति धायेवं हे थ्व घृणित कासा खः धइगु गलत धारणाया अनुशरण याःवनेफु। वास्तवय् राजनीति व राजनीतिक गतिविधि देश व जनताया लागिं हे यायेमाःगु उल्लेखनीय ज्या खः। तर मनूतय्सं गतल रुपं उकियात प्रयोग व परिभाषित याना बीगुलिं नं आपालं मनूत राजनीति नापं वितृष्णा ब्वलंकाच्वंपिं पिहां वयाच्वंगु खः। उकिं न्हूगु पुस्तायात सक्षम व सवल ढंगं नेतृत्व प्रदान यायेगु खत धाःसा न्हापां छगू नं छगू राजनीतिक दर्जनया पू लिना आः थ्व देय्यात छु कथं गज्याःगु कथं न्ह्यज्याके फइगु खः धइगु निं ध्यान तयेमाः। मखुत धाःसा वर्तमान इलय् सरकार व राजनीतिक पार्टीं न्ह्याक्वः हे सहमति, सहकार्य व मेलमिलापया राजनीति यायेगु धयाच्वंसां तबि नं झीगु देशय् अन्यौल व अराजकता हे जक न्यनाच्वनी। बांलागु वातावरण ब्वलने फइमखु ।

शैक्षिक विकास, आर्थिक विकास व सामाजिक विकास क्रमं राजनीतिक पार्टीतय् मान मर्यादा व उत्साह थहां वयेकीगु खः। अथे जुयाः राजनीतिक पार्टीतय्सं विशुद्ध राजनीतिक खँ जक ल्हायेगु सिवाय् थःपिंत ज्या छिं थें ज्याःगु सामाजिक व आर्थिक गतिविधिइ नं न्हूगु पुस्तायात सरिक याना वने फत धाःसा सहमतिया राजनीति नं ताःलाइ। विपक्षी राजनीतिक पार्टीतय्सं नं विश्वास याइ। न्हूगु पुस्तां नं न्हूगु संविधान तयार यायेत सहमति यानाक्यनी ।

More Stories Like this