फुक्क हे नेतातय्गु सुविधा लित कायेमाः
सरकारं मितव्ययिता सम्बन्धी न्हूगु नियमावली सार्वजनिक याःगु दु। सत्ताय् च्वनीपिं राजनीतिक पार्टीया नेतात तसकं विलासी जुया वःगु व उमिगु अज्याःगु शौख पूवंकेत राज्यं आपालं दां खर्च याये मालाच्वंगु खँयात वाःचायेकाः सरकारं आः नकतिनि हे अज्याःगु नियमावली पित हःगु खः। गुकी देय्या राष्ट्रपतिं तकं ३० लाख स्वयां अप्वः तका वंगु गाडी गये दइ मखु धइगु खँ उल्लेख यानातःगु दु ।
राष्ट्रपति लगायत सुं नं सरकारी पदाधिकारीं थिकेगु गाडी गये दइ मखु धाःगु उमिगु गरिमा क्वकायेत याःगु ज्या मखु। सरकारी पदाधिकारीतय्सं थःगु गज्याःगु देशय् च्वंच्वना व थःगु देशया अवस्था गज्याःगु खः धइगु खँयात नं छक्वः मनन् यायेमाःगु आवश्यकता दु। नेपाः थेंज्याःगु गरीब देया पदाधिकारी जुयाः अमेरिका थेंज्याःगु देशया सरकारी पदाधिकारीतय्सं काइगु थेंज्याःगु सुविधा कायेत स्वयेगु पाय्छि ज्या मखु ।
पुलांम्ह गृहमन्त्री भिम रावलं थम्हं यंकातःगु गाडी लित मबिउगु खँय् न्ह्यसः वःबलय् थःत सुविधा वापत हे वइगु जूगुलिं थम्हं लित मबियागु खः धकाः लिसः बियादिल। थज्याःपिं निकृष्ट व परजीवी नेतात दत्तले देशं गबलें प्रगति याये मफइगु निश्चित दु। सरकारं आवंलि मन्त्री पद त्वःतेधुनेवं गाडीया सुविधा दइगु व्यवस्थायात नं खारेज यानाः सुविधा कयातःपिं फुकसिगु सुविधा लित कायेमाः। कन्हय् नेपालं यक्व विकास यायेधुंकाः व धनी जुइधुंकाः यदि आवश्यक जुल धाःसा अज्याःगु सुविधा बिया वनेगु पाय्छि नं जुइ। देशयात कंगाल यानाः सुं नं नेतायात सुरक्षाया नामय् सुविधा बिया तयेमाःगु जरुरी मदु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
