लुँ दान बीम्ह लुँचुं महाद्यः

कृष्ण

विक्रम संवत १९९० सालया तःभुखाचय् लानाः पुलांगु देगः दुने धुंकाः न्हूगु कथं निर्माण यानाः पूजा विधि चले याना वयाच्वंगु लुँचुं महाद्यः ख्वपया छगू आकर्षक पर्यटकीय थाय् कथं कायम जुइत ताःलाना वयाच्वंगु दु। लँया सुविधा, घना जंगल, स्वनिगःया फुक्कं दृश्य बांलाक खने दुगु नापं तसकं हे शान्त, सुन्दर व सौम्य थाय् जूगु ल्याखं नं थन वइपिं आन्तरिक व बाह्य पर्यटक खालि हे मजुइक दयाच्वंगु दु। खय् भासं सुवर्णेश्वर धाइम्ह उम्ह द्यःयाथाय् थौकन्हय् छम्ह पूजारी, छम्ह साधु व फ्वनाः नइम्ह मधेसी मूलया छम्ह मनू च्वनाच्वंगु दु। दत्या न्ह्यःनिसें अन पूजारी कथं नियुक्त जुयादीम्ह दधिराम सापकोटाया कथं उम्ह द्यःयात भुनेगु कथं वंगु जेठ महिनांनिसें अन सिजः पाता नं तयेगु यानातःगु दु। सुथय् नित्य पूजा यायेगु, न्हिनय् सफा यायेगु व सनिलय् नं पूजा यानाः द्यःयात जलं लुकेगु वयागु दिनचर्या खः ।

गुथि स्थापना जुसांनिसें थन पूजाया परम्परा दुगु खःसां गाविस व गुथिया छुं दामं हे थ्व द्यइके सुरक्षा व सफाईया बन्दोबस्त जुयाच्वंगु दु। थुलि न्ह्यइपुगु थाय् जूगुलिं थन आः न्हियान्हिथं योग याइपिं छपुचः मनूत नं वयेगु शुरु जूगु दु। उमिसं अन पूजारीयात न्यासः दां लय् बियाः सुकू दुकायेगु, बँ पुइगु व सुकू वा लासा प्यात धाःसा छकः पायेगु थेंज्याःगु ग्वाहालिया ज्या जुयाच्वंगु दु। साधु चिनमायानन्द सरस्वती थन च्वनेगु यानाहःगु निदँ दयेधुंकल। फम्पिं वःम्ह उम्ह साधु आः अनं बिदा जुइगु तरखर यानाच्वंगु दु। सुथय् बहनीया लागिं धुं, मत, स्वां, लः थःम्हेस्यां हे बन्दोबस्त याना वयाच्वंम्ह पूजारीं गुथि संस्थानं बीगु लय् निद्वः तका दां व साधुया पेन्सिन कथं वइगु झिंछसः तका दामं हे गुजारा चले यानाच्वंगु दु ।

हण्डि कथं वइगु उगु दामं हे टेलिफोनया बाः पुलेमाः। कटुञ्जे गाविसय् लाःगु थुगु थाय् कटुञ्जे गाविसया पुलांम्ह अध्यक्ष रामेश्वर ढुंगेलया पालाय् बांलाकेगु ज्या याःगु खः। अन १९९० सालय् अभि कार्कीपाखें जीर्णोद्धार याःगु उल्लेख जुयाच्वंगु दु। संवत ८९७ य् न्हापांखुसी निर्माण जूगु उल्लेख जुयाच्वंगु थुगु देगः विक्रम संवत १८४६ सालय् जुजु रणबहादुर शाहया पालाय् गांयापिं मिले जुयाः दयेकूगु खः धाइ। अथेहे लिपांखुसी २०५४ श्रावण २० गते नं अन भीमसेन थापाया नेतृत्वय् जीर्णोद्धार यानाः पूजा पाठया व्यवस्था यानातःगु खः। उगु डाँडा २५-३० रोपनी दु। मेगु बाली वइगु जग्गा दु मदु सुनानं मसिउ। न्हापा न्हापा थन ख्वपं हे छम्ह नेवाः ब्रम्हू नं व्यवस्था यानातःगु खः। थ्व ल्याखं थ्व द्यः नेवाःतय्सं जक स्थापना यानातःगु देगः जकं खःला धइगु नं अनुमान यायेफु। उम्ह नेवाः ब्रम्हू नं बाली मवःगुलिं उगु थाय् त्वःतूगु खः धाइ। वयां लिपा धाःसा थन खय् ब्राम्हणत हे जक बन्दोबस्त यानातःगु दु ।

आः तक नं थन जोडी चाःहिउ वःसां छुं छुं ल्याय्म्हत धाःसा गजि सालेत नं वः। अय्नं उपिंपाखें उपद्रो वा बांमलाःगु घटना धाःसा आः तक जूगु मदुनि। छगू इलय् छम्ह मचां चन्दा बाकस हे तछ्यानाः खुइत स्वःगु बाहेक खुइगु घटना नं जूगु मदुनि। अथे जुयाः थ्व थाय् गां स्वयां अलग्ग खःसां थन वइपिं अधिकांश मनूत आनन्द कायेत, पलख शितल यायेत व मन शान्त यायेत वइगु जुयाः नं थ्व थाय् छगू ल्याखं धार्मिक व पर्यटकीय ल्याखं नं उत्कृष्ट जुया बिउगु दु। न्हापा न्हापा थन पूजाभू थीकेवं लुँ जुइगु धारणा दु। लुँचुं महाद्यः धाइम्ह उम्ह द्यःयात ख्वपं न्हियान्हिथं वइम्ह छम्ह भक्तं थः छन्हु निन्हु वा वःगु कारणं वये मफयेवं थःगु हे छेँय् उम्ह द्यःयात ज्वना वने धकाः म्हिचाय् स्वथनेत लीत स्वःगु इलय् तिनि द्यः तःधिकः जुया वल धइगु बाखं दु। नापं उगु इलय् अन च्वंपिं झिंनिम्ह पंछि ब्वयाः धोर समुद्रय् वंगु उखान दु। नापं क्वय् लाक्क स्थापना यनातःम्ह नारांद्यःया ख्वपया जुजुलिसे स्वापू दुगु व ध्वंया रुपय् उम्ह नारांद्यवं राजकुमारी ब्याहा याना हःगु बाखं नं सुवर्णेश्वर महाद्यः धयातःम्ह लुँचुं महाद्यःनाप स्वानातःगु दु। धुं सालाहःम्ह न्यादँ दुम्ह छम्ह मचायात महाद्यवं बचे याःगु व लिपा तःधिकः जुइवं वयात हे जुजु याःगु बाखं नं दु ।

More Stories Like this