सफल जूगु दु

नर्मदेश्वर प्रधान

खँयाखँय्
सिक्किम नेवाः गुथिया निमन्त्रणाय् वंगु वाय् जिपिं सिक्किम थ्यनी। येँयाःपुन्हीया उपलक्ष्यय् सिक्किमय् कुमारी जात्रा सम्पन्न जुइ। सिक्किमया नेवाःतय्के जातीय, सांस्कृतिक चेतना, जागरण ब्वलना वयाच्वंगु खनेदइ। जातीय, सांस्कृतिक चेतना, जागरणया अभिव्यक्ति कुमारी जात्राया माध्यमं प्रदर्शित जुइ। येँनं बाजं खलः वनी। न्ह्यःने न्ह्यःने बाजं। अले कुमारीया खः। मोटरया द्यःने। मोटरय् खिपः घाइ। सालेगु भाय् यानाः न्ह्याकी। जात्राय् स्थानीय नेवाःतय् ख्वात्तुगु सहभागिता दइ। मचाः, बुढा, ल्याय्म्ह, ल्यासे। जात्राय् सम्मिलित जुइ। जात्रां नगर परिक्रमा याइ। बाखं दबूपाखें वनापिं जिपिं। १२ म्ह साहित्यकारत। जिमिस नं प्रोसेसनय् ब्वति काये। कुमारी खः लिसे लिसे सिक्किम शहर चाःहिले। कुमारी खःयात नगर परिक्रमा याके न्ह्यः कुमारीया विधिवत पूजा जुइ। बाखं दबूया नायः भाजु लक्ष्मण राजवंशीजुं नेवाः संस्कृतिइ कुमारीया महत्व बारे जः ह्वलादिल। सिक्किमया नेवाःतसें पूजाय् ब्वति काइ। कुमारी जात्रायात सिक्किमवासीतसें जातीय पर्वकथं न्ह्याकेत स्वयाच्वंगु दु। अनुभव जुइ ।

बाखं दबू। जिमि उद्देश्य सिक्किमया साहित्यिक कार्यक्रमय् सहभागी जुइगु खः। थुकिया लागि सिक्किमया नेवाः गुथिं माःगु फुक्क व्यवस्था याइ। काठमाडौंनं जिपिं टुरिस्त बसय् वने। वनापिं स्वीन्हय्म्ह दु। १२ म्ह बाखं दबूपाखें। मेपिं कलाकारत। सांस्कृतिक कार्यक्रमय् ब्वति काइपिं। प्रसिद्ध गायक पवित्र कसाः , गायिका दिपा मर्हजन। फोटो जर्नालिस्ट यलु जोशी। नेपाल मण्डलया संयोजक ज्ञान कुमार महर्जन। टोली दुथ्याइ। बहनी सिक्किम सरकारी महाविद्यालय प्रेक्षागृहसं सांस्कृतिक कार्यक्रम सम्पन्न जुइ। पूर्वसूचना कथं उगु सांस्कृतिक कार्यक्रमय् सिक्किमया मुख्य मन्त्री पवन चामलिङ्ग वइगु जुयाच्वंगु। तर कार्य व्यस्ततावस वय्कः कार्यक्रमय् वये मफुत। सिक्किम सरकारया माननीय मन्त्री एम.के. प्रधानपाखें सांस्कृतिक कार्यक्रमया उद्घाटन जुइ। सांस्कृतिक कार्यक्रम भव्यकथं न्ह्याइ। नेवाः प्याखं, म्येत प्रस्तुत जुइ। सिक्किमया कलाकारपिसं नं नेवाःप्याखं क्यनी। चर्या प्याखं न्ह्यब्वइ। सिक्किमय् नेवाः प्याखं थुलि बांलाक्क क्यने गय् सम्भव जुल? कलाकारत गुकथं तालिम जुल? न्ह्यसः लुइ। थ्व खँय् भाजु गणेशरामजुया तःधंगु योगदान दइ। वय्कलं सिक्किमया कलाकारतय्त काठमाडौंस सःती। प्याखं , संगीतया तालिम बी। सिक्किमय् प्याखं, म्येँ ख्यःया विशेषज्ञत छ्वइ। कलाकारतय्त प्याखं संगीतया तालिम बी। भाजु गणेशरामं नियमितरुपं यानाच्वंगु कुतःया फलस्वरुप सिक्किमय् नेवाः संस्कृतिया प्रचार प्रसार सम्भव जुया बी। सिक्किमी नेवाःतय्के जातीय, संस्कृति, जागरण गाक्क खनेधुंकल। तर सांस्कृतिक रितिथितिया पर्याप्त ज्ञांया कमीं यानाः वय्कःपिं सीके सयेके तसकं हे उत्सुक। व उत्सुकता पूवंकेया लागिं सांस्कृतिक ज्ञां, विधि, सामग्री चूलाकाः बीगु आवश्यकता खनेदै ।

१३ सिटम्बर कुन्हु स्थानीय जनता भवनसं सिक्किम नेवाः गुथि व बाखं दबूया बाखं न्यंकेगु संयुक्त कार्यक्रम जुइ। कार्यक्रमय् सिक्किमया माननीय मन्त्री, सिक्किम ऐकाडेमिया अध्यक्ष व यक्व गणमान्य व्यक्तितय् उपस्थिति दइ। बाखं दबूया १२म्ह व सिक्किमया ५म्ह बाखं च्वमिपिंसं बाखं ब्वनी। येँनं वंपिनि बाखं मूल नेवाः भाषाय् खः। तर अन नेपाली अनुवाद याना न्यंकी। तसंक हे सौम्य वातावरणय् बाखंया वाचन व श्रवन कार्यक्रम न्ह्याइ। बाखं दबूपाखें प्रस्तुत बाखंतसें श्रोतातय्त तसकं हे प्रभावित याइ। सिक्किम ऐकाडेमिया अध्यक्षं ब्वंगु बाखंतय् चीहाकःगु समिक्षा यासें प्रस्तुत बाखंत अन्तर्राष्ट्रिय स्तरया जूगु मनतब्य प्वंकी। सिक्किमया नेवाःतलिसे साहित्यिक स्वापू स्वनेगु शायद थ्व न्हापांगु पलाः जुइ। बाखं दबुलिं थ्व खँय् तःधंगु सन्तोष काइ। बाखंया कार्यक्रमय् माननीय मन्त्री, सिक्किम ऐकाडेमीया अध्यक्ष, सिक्किम नेवाः गुथिया पुलांम्ह नायः भू.पु मुख्य सचिव के.सी. प्रधान व मेपिं श्रोता वर्गत ७ घौ तक च्वनी। बाखंत ध्यान बियाः न्यनी ।

बाखं दबूया उद्देश्य छु? गज्याःगु बाखंत प्रस्तुत जुइ? आयोजकतसें कार्यक्रम दयेकेत छलफल जूबलय् जिज्ञासा प्वंकी। बाखं दबूया उद्देश्य प्रत्यक्षत बाखं खनेदइ। तर व्यापक अर्थय् बाखं दबूया सरोकार बाखं विधाय् जक सीमित मखु। बाखं त्वहः जक खः। बाखंया माध्यमं सांस्कृतिक जातीय जागरण थनेगु, मानवीय स्वापू क्वातुकेगु। आदान प्रदान यायेगु। सद्भावना ब्वलंकेगु। पारस्परिक अनुभव इना कायेगु। बाखं दबूया सही उद्देश्य जुइ। बाखं दबुलिं थःगु अवधारणा स्पष्ट याइ ।

स्वनिगलं पिने। बाखं दबू तःथाय् वनेधुंकल। स्वनिगलं पिनेयापिं दाजुकिजापिं दथुइ आत्मीयता स्वनीगुलि बाखं दबू सफल जुइ। बाखं दबू थुगुसी विदेशय् थ्यनी। सिक्किमय् बाखं दबूया सम्पर्क सिक्किमया नेवाःत लिसे खः। तर सिक्किम विदेश खः। बाखं दबूया सिक्किम यात्रा न्हापांगु विदेश यात्रा जुइ। सिक्किम नेवाः गुथिं बाखं दबूयात तःधंगु स्वागत सत्कार क्यनी। नेवाः गुथिं क्यंगु आतिथ्य सत्कारप्रति बाखं दबू कृतज्ञ। विशेषत सिक्किम नेवाः गुथिया नायः भाजु आर.के. प्रधानप्रति बाखं दबुलिं आभार व्यक्त याइ ।

सिक्किमी नेवाःतय्के नेवाः संस्कृति, साहित्यबारे पर्याप्त ज्ञां मदुनि। तर थ्व विषयय् सयेकेमाः सीकेमाः धइगु जागरण सिक्किमी नेवाःतय्के तसकं हे खनेदु। नेवाः संस्कृति, साहित्यबारे सीकेत वय्कःपिं तसकं हे आतुर। भाजु गणेशराम प्रजापतिं सिक्किमय् नेवाः संस्कृति संगीत नृत्यया विकासया लागिं तसकं हे कुतः यानाच्वंगु दु। याकनं हे सिक्किमय् नेवाः महोत्सव जुइगु खँ दु। सिक्किमया नेवाःतय् सांस्कृतिक जागरण, उत्साहयात झीसं थुइकेमाः। माःगु सांस्कृतिक ग्वाहालि बी फयेकेमाः। बाखं दबू साहित्यिक संस्था खः। तर थ्वया सरोकार जीवनया हरपक्ष लिसे दइ। सिक्किम यात्राय् बाखं दबू नं बाखं विधाया माध्यमं सिक्किमी नेवाःतलिसे सांस्कृतिक, साहित्यिक, मानवीय स्वापू क्वातुकेत सफल जूगु दु ।

More Stories Like this