भुखाचं वचय् जुइगु तरिका

म्हिगः आपुलुखं भ्वखाय् ब्वयेवं स्वनिगलय् तःधंगु हलचल व ख्याच्वःया लकस ब्वलंगु दु । संसद भवनं निसें येँया त्वाः त्वालय् मनूत छेँ पिहांवयाः सतकय् मूवंगु दु । सतक जायेक मनूया मनखं जाल । थ्वस्वया ब्वःगुया घन्टौ लिपा तकं थुगु अवस्थां सतक मुक्त मदु । अज्जला गुलिखय् मनूतला छेँय्तकं दुहां मवंसे सतक, चुक बाहाः आदि थासय्हे चच्छिं छ्वल । भ्वखाय् ब्वइगु खँ धयागु न्ह्यःहे सुनां धायेफैमखु । विज्ञानं वा वइगु, फय् वइगु खँया भविष्यवाणी यायेत सक्षम जूगु दु, तर भ्वखाय् ब्वइगुया भविश्यवाणी थों तक्क यायेफूगु मदुनि । उकि भ्वखाय् ब्वइगुया पूर्व सुचना मदइगु अवस्थाय् भ्वखाय् ब्वइ वलय् झी थःपिं गथ्य यानाः सुरक्षित जुइगु धयागु ज्ञान झी सकलसिके दयेमाः । म्हीगः वःगु भुखाय् धयागु ६-८ रेक्टर स्केलया खः । करीव वागू डर्जन मनूत सीगु थुगु भुखाचं स्वनिगः जक मखु अधिराज्यया थाय् थासय् म्हो वा अप्वः प्रभावित याःगु दु । अप्वः पूर्विय क्षेत्रय् भुखाचं यक्को छेँत दुगु दुसा यक्को मनूत घाःपा नं जूगु दु ।

सीपिनिगु ल्याः नेपालय् स्वयाः भारतय् अप्वः दु, सिक्किमय् ७ म्ह, पश्चिम वंगालय् ४ म्ह, विहारय् २ म्ह यानाः म्हिगः चान्हय् तक्कया दुने १३ म्ह सी धुंकूगु दुसा सच्छिम्हं स्वयाः अप्वः मनूत घाःपाः जूगु दु ।
भारतया सिक्किम, पश्चिम वंगाल, मेघालय्, आसाम, त्रिपुरा, विहार, उदिसा, कारखण्ड, उत्तरप्रदेश, उत्तर खण्ड, न्हूदिल्ली व चाण्डीगढय् तसकं प्रभावित याःगु दु । थ्व वाहेक थुगु भुखाचं नेपाः भारत वाहेक वंगलादेश व चीनय् तक्क प्रभाव त्वःतूगु दु । नेपालया पूर्वाञ्चल क्षेत्रया यक्कों जिल्ला व शहरय् बांमलाक प्रभाव त्वःतूगु दु । भुखाय् व्वइगु भविश्यवाणी यायेमफैगुलिं भुखाय् ब्वहवलय् छु गुकथं झी अप्वःयासे अप्वः बचय् जुइगु धयागु पाखे ध्यान वीगु जरुरी दु । भ्वखाय् ब्वयेवं झीसं दकले न्हापां मि व मतयात सुरक्षित यायेमाः । मि च्याःसा वा ग्यास च्याकाः ज्या यानाच्वंसा तत्काल ग्यास वा मि स्यानाः सुरक्षित यायेगु यायेमाः । ततःजाःगु छेँय् च्वना च्वंपिं भ्वखाय् ब्वलकि ग्यानाः झ्यालं तिंन्हुया वइगु खनेदु । थ्व अतिकं मूर्खतापूर्ण पलाः खः । छेँय् च्वंपिं फुसा कुहां वयाः छेल्लिइ वयेगु वा चौरय् वनेगु यायेमाः । भ्वखाय् ब्वइवलय् खापा लुखा झ्याः आदि चायेकेगु यायेमाः । छेँ पिहां वनेगु सम्भावना मदुसा छेँ दुनेहे सुरक्षित जुइगु थासय् च्वनेगु यायेमाः । क्वथाया चौकोस क्वसं वा टेवलया तलय् च्वनेगु यायेमाः । दुना वःगु हे अवस्थाय् म्होनिं थःगु छ्यों वचय् यायेत स्वयेमाः । छेँय् मच्वंसे पिहां हे वःसां खुल्ला चौरय् वनेमाः । चौरय् नं लत्था व सिमा व ततःजाःगु छेँ क्वस च्वनेमज्यू । गल्तिइ लाःसा छुंनं छखा छेँया अंगलय् लिक्क च्वनेमाः । मोटरय् व मोटरसाइकल बायाँपाखे मोरय् यानाः पार्क यायेगु । निशेधित क्षेत्र आदि थासय् मवनेगु । चलः, ततःग्वःगु लोहं आदिं बचय् जुइमाः । छेँ त्वःताः चौरय् वनेवलय् छता निता जक सामान यंकेगु, अप्वः सामानया लोभ मयायेगु । थ्व वाहेक भुखाय् ब्वइवलय् छु यायेमाः ? छु गुगुकथं थःपि बचय् जुइगु धयागु जनचेतनामूलक ज्याझ्वः न्ह्याकेमाः । न्हून्हूगु छेँ दयेकेवलय् भुकम्प प्रतिरोधातक प्रकृया अनिवार्य यायेमाः ।

More Stories Like this