भुखाचं नेपाः, भारत व चीनय् ५० म्ह मल्याक सित

येँ (झीगु स्वनिगः)

नेपाःया इतिहासय् विक्रम संवत १९९० माघ २ गते तःभुखाय् धुंकाः आः तकया दुने दक्ले तःधंक आइतवाः बहनी भुखाय् ब्वयाः नेपाः, भारत व चीनय् यानाः ५० म्हं मल्याक मनूत सीगु दु । सिक्किमय् केन्द्रविन्दु जुयाः ६ दशमलब ९ रेक्टर स्केलया भुखाय् ब्वयाः छेँ, पःखाः दुनाः ल्हानाः नेपालय् ९ म्ह, भारतय् ३५ म्ह अले तिब्बतय् ७ म्ह मनूत सीगु दु । भुखाय् ब्वयाः येँ, ख्वप, झापा, संखुवासभा व धनकुटाय्, नापं यानाः सीपिं गुम्ह थ्यंगु दु । भुखाय् ब्वयाः होस मदुम्ह ख्वपया ६५ दँ दुम्ह लिला पौडेल सीगु दु । अथे हे संखुवासभाय् ५ दँ दुम्ह प्रदिप राई, धनकुटाय् ४० दँ दुम्ह मधु कार्की, झापाय् ६ दँ दुम्ह आयशा घिमिरे, येँय् ३६ दँया साजन श्रेष्ठ, वय्कःया ८ दँ दुम्ह म्ह्याय् अनिशा श्रेष्ठ व २० दँ दुम्ह वीरबहादुर माझी सीगु खः ।

भुखाय् ब्वयाः नेपालय्. ७७ म्ह घाःपाः जूगु दुसा इपिं मध्ये २४ म्ह गम्भीर दु धकाः प्रहरीं धाःगु दु । अथे घाःपाः जूपिन्त येँया वीर अस्पताल, यलया बी एण्ड बी अस्पताल, ठमेलया मनमोहन मेमोरियल अस्पताल, ओम अस्पताल व पाटन अस्पतालय् वासः यायेगु ज्या जुयाच्वंगु दु । सामान्य घाःपाः जक जूपिन्त धाःसा वासः यानाः छेँय् लिछ्वये धुंकूगु दु । भुखाय् ब्वयाः भारतया सिक्किमय् २३ म्ह, भारतया थीथी राज्यय् याना १२ म्ह अले तिब्बतय् ७ म्ह मनूत सीगु दु । आइतवाः बहनी ६ बजे जुयाः २६ मिनेट वंगु इलय् अथे भुखाय् ब्वःगु खः । भुखाय् ब्वये धुंकाः ता ई तकं मनूत ग्यानाः छेँय् हे मवंसे पिने च्वनाच्वंगु खः । भ्वखाय् ब्वयाः देय्न्यंकं यानाः सच्छिखां मल्याक छेँ दुनाः क्षति जूगु दु । ख्वप जिल्लाय् जक हे ५७ खा छेँ दुनावःगु दु । ख्वपया दधिकोट गाविसय् जक हे २४ खा छेँ दुनावःगु दु । ख्वपय् छेँ दुनाः ल्हानाः १३ म्ह घाःपाः जूगु दु ।