ल्वापुइ छम्ह प्रहरी नापं निम्ह सित

येँ (झीगु स्वनिगः)

बाराया सनफुलवा लिकसं प्रहरी व सशस्त्र पुचःया दथुइ जूगु भिडन्तय् लानाः छम्ह प्रहरी नापं निम्ह सीगु दु । म्हिगः सोमवाः सुथय् ९ बजे भिडन्त जुयाः प्रहरी हवल्दार व सशस्त्र पुचःया छम्ह कार्यकर्ता सीगु खः । गोलीं कयेकाः ल्वापु जुयाः प्रहरी जवान रमेश राउत कर्मी व सशस्त्र पुचःया अजय यादव धाइम्ह जयमंगल यादव सीगु खः । यादव सशस्त्र भूमिगत पुचः जनतान्त्रिक तराई मधेस मुक्ति पार्टी भगतसिंह पुचःया बारा जिल्ला अध्यक्ष अजय यादव सीगु खः । गोलीं कयेकाः जूगु ल्वापुइ लानाः यादव घटनास्थलय् हे सीगु खःसा हवल्दार कुर्मीयात धाःसा येँय् हयाः वासः यानाच्वच्वं हे सीगु खः । हवल्दार कुर्मीया छ्यनय् गोलीं कःगु खः।

घटना विवरण कथं गस्तीइ वनाच्वंगु प्रहरीया पुचःयात सशस्त्र पुचःपाखें आकाझाकां आक्रमण याःगु खःसा उगु इलय् प्रहरीं प्रतिकार यायेवं निथ्वःया दथुइ गोलीं कयेका भिडन्त जूगु खः । बारा जिल्लाय् अथे घटनालिपा अन ब्यापक रुपं प्रहरी परिचालन याःगु खः । उगु इलय् प्रहरीं सशस्त्र पुचःया कार्यकर्ता बारा जिल्लाया मझरीयाया श्रीलाल यादवयात नियन्त्रणय् काःगु दुसा मेम्ह छम्ह धाःसा बिस्युं वंगु दु ।