नेपाली कांग्रेसया भातृ संगठनत स्वंगू गुट जुल

कांग्रेसया ज्याकुथिइ अनसन

येँ (झीगु स्वनिगः)

नेपाली कांग्रेसया संस्थापन पक्षं भातृ संगठनत विघटन यायेगु अन्तिम तयारी यायेवं भातृ संगठनत स्वंगू गुट जूगु दु । भातृ संगठनया छगू पक्षं पार्टीया संस्थापन पक्षया प्रस्तावयात समर्थन याःगु दुसा मेगु पक्षं विरोध याःगु अले स्वंगूगु पक्षं धाःसा विवाद आवश्यक मजू धकाः मध्यमार्गीया लँपु ज्वंगु दु । थ्व हे झ्वलय् नेपाल तरुण दलया नायः महेन्द्र यादवया नेतृत्वय् भातृ संगठन विघटन याये दैमखु धकाः उकिया विरोध यानाः कांग्रेसया केन्द्रीय ज्याकू सानेपाय् आमरण अनसन च्वंगु दु । इपिं म्हिगः सोमवाः न्हिनय् १ बजेनिसें अनसन च्वंगु खः ।

थ्व हे दथुइ उगु अनसनया विरोध यानाः संस्थापन पक्षया समर्थनय् महासचिव हुर्मत न्यौपानेया नेतृत्वय् मेगु पुचः नं अनसन च्वनेगु तयारी यानाच्वंगु दु । इपिं नं अथे हे पार्टीया केन्द्रीय ज्याकुथिइ रिले अनसन च्वंगु खः । नेपाल आदिवासी जनजाति संघ, नेपाल तरुण दल, नेपाल विद्यार्थी संघ, नेपाल भूतपूर्व सैनिक संघ, नेपाल महिला संघ व नेपाल प्रजातान्त्रिक सेनानीयात विघटन यायेगु धकाः कांग्रेसया संस्थापन पक्षं पार्टीया केन्द्रीय समितिया मुँज्याय् प्रस्ताव हःगु खः । पार्टीया सभापति सुशील कोइराला नाप जानाः महामन्त्री प्रकाशमान सिंहं अथे भातृ संगठन विघटन यायेगु धकाः प्रस्ताव हःगु खः ।
उगु प्रस्तावयात कयाः कांग्रेसया बरिष्ठ नेता शेरबहादुर देउवा पक्षं विरोध यानाः वयाच्वंगु खः । कांग्रेसया भातृ संगठनय् देउवा पक्षया बहुमत दुगुलिं अथे कोइराला पक्षं भातृ संगठनत विघटन यायेगु डिजाइन कथं हे ज्या यानाच्वंगु खः धकाः नेतातय्सं धयाच्वंगु दु ।

भातृ संगठनतय्गु म्याद फुगुलिं अधिवेशनया माध्यमं न्हूगु नेतृत्व ल्ययेत तदर्थ समिति जक दयेकेगु धकाः कुतः यानाः प्रस्ताव हःगु खःसा देउवा पक्षं धाःसा निर्वाचित केन्द्रीय समिति जूगुलिं भातृ संगठनत विघटन मयासे अधिवेशनया माध्यमं न्हूगु नेतृत्व ल्ययेमाः धकाः धयाः वयाच्वंगु खः । थनिनिसें कांग्रेसया केन्द्रीय कमिटीया मुँज्या जुइगु अले उगु मुँज्यां भातृ संगठनया खँ क्वःछिइ धाःगु दु ।