भुखाचं सीपिनि ल्याः च्याम्ह थ्यन

ख्वपय् जक ५७ खा छेँ दुन, आपालं घाःपाः

देय्न्यंकं न्यागू दर्जनं मल्याक मनू अस्पताल भर्ना

येँ (सन्ध्या टाइम्स)/म्हिगः सनिलय् ब्वःगु भुखाचं ल्हानाः सीपिं नेपाःमितय् ल्याः थौं सुथय् तक च्याम्ह थ्यंगु दु।
भुखाय्या कारणं दुना वःगु पःखाः, छेँ आदिइ लानाः येँ, ख्वप व धनकुटाय् यानाः आः तक च्याम्ह सीधुंकूगु दु। भुखाचय् लानाः येँय् स्वम्ह, संखुवासभा व झापाय् छम्ह/छम्ह, सुनसरीइ निम्ह सीगु दु। भुखाय् ब्वयाः बेहोस जूम्ह ख्वपया गठ्ठाघरनिवासी ६५ दँया लीला पौडेलया अवस्था गम्भीर जुयाच्वंगु खँ सीदुगु दु ।

छेँ दुनाः धनकुटा फलाँटे ५ या ४० दँ दुम्ह मधु कार्की व सुनसरीया हरियापुरया ५० दँ दुम्ह पवित्रादेवी मण्डल थौं सीगु खः। म्हिगः भुखाय् ब्वःगु इलय् लैनचौरया बेलायती दूतावासया पःखाः दुना ल्हानाः गोरखाया ३६ दँ दुम्ह साजन श्रेष्ठ व वय्कःया च्यादँ दुम्ह म्ह्याय् अनिशा व सिन्धुलीया २० दँ दुम्ह वीरबहादुर माझी सीगु खः। अथे हे सुनसरीया धरान नगरपालिका १३ वडाय् छेँया पःखाः दुनाः ओलखढुंगा कटुन्जेया २० दँ दुम्ह सन्तोष परियार व वय्कःया भिन्चा न्हय्दँ दुम्ह विमल परियार नापं शंखुवासभाया नुम गाविसया लहप्रसाद राईया न्यादँ दुम्ह काय् प्रदीप राई सीगु खः ।

म्हिगः सनिलया ६.२६ बजे सिक्किम केन्द्रविन्दु जुयाः ६ दशमलव ९ रेक्टर स्केलया भुखाय् ब्वःगु खः। उकी लानाः नेपालय् जक न्यागू दर्जनं मल्याक मनू घाःपाः जूगु खः। घाःपाः जूपिं मध्ये येँया वीर अस्पतालय् निगू दर्जनं मल्याक मनूत हयातःगु दुसा पाटन अस्पतालय् छम्ह, यलया बी एण्ड बी अस्पतालय् न्याम्ह, ठमेलया मनमोहन मेमोरियल अस्पतालय् स्वम्ह, ओम अस्पतालय् निम्हेसित वासः याकातःगु दु ।

प्रहरीं बिउगु जानकारी कथं स्वनिगलय् जक ६६ म्ह घाइतेयात वासः याकेत थीथी अस्पतालय् हःगु दु। अस्पताल महःपिनि ल्याः थुकी उल्लेख मदु। अथे हे भुखाचं चलः वनाः धरान-धनकुटा राजमार्गया भेडेटार मालबासे सडकखण्ड अबरुद्ध जूगु दु ।

म्हिगःया भुखाचय् लानाः ख्वप जिल्ला दुने जक ५७ खा छेँ दुनावंगु दु। अन १३ म्ह मनू घाःपाः जूगु दुसा दधिकोटय् जक २४ खा छेँ दुनावंगु दु। भुखाचय् लानाः ख्वप नपा वडा ६ खँचाय् च्वंगु सर्वज्ञराज शाहीया प्यतँ जाःगु छेँया दक्षिण मोहदा पूवंक दुनावंगु खः। १० वडा ब्यासी त्वालय् च्वंगु लक्ष्मीनारायण बासुकलाया च्वय्या नितँ दुनावःगु खः। उगु छेँ दुनाः हरिप्रसाद बासुकलाया छेँ नितँ ल्हाःगु दु। अथेहे १३ वडा खौमा त्वालय् च्वंगु सुभद्रा पाँतीया छेँया पश्चिम मोहदा नं पुवंक हे दुनावःगु दु। वडा नं.-६ या हे चोर्चा त्वालय् च्वंम्ह बुद्धिकुमार लाखाजूया नितँ जाःगु छेँया अंगः दुनावःगु दुसा याताय् धाःसा न्हुछेँ गोसाईया छ्यलिया अंगः दुना वःगु दु। नंखेलय् नं सुमित्रा ब्याञ्जु व सुनिल थापाया छेँया अंगः दुनावःगु दु। उकी लानाः थिमिया रत्नमाया राजबाहक घाःपाः जुयाः अस्पतलाय् यंकूगु खः। छालिङया विनिता मुङ्ग्रातियात नं बेहोस अवस्थाय् वासः याकेहःगु खः ।

पाँचथरय् छगू दर्जनं मल्याक छेँ दुना वंगु दुसा पीडित मनूत स्थानीय विद्यालय व थःथितिपिंथाय् च्वनेत बाध्य जूगु दु। भारतया सिक्किमय् ७, दार्जिलिङय् ३, विहारय् २ व सिलगुडीइ छम्ह नापं यानाः २६ म्ह मनू सीगु दु। भारत न्यंकंयानाः न्यय्म्हं मल्याक घाःपाः जूगु दुसा तिब्बतय् नं न्हय्म्ह मनू सीगु समाचार वःगु दु ।

विक्रम संवत १९९० माघ २ गते तःभुखाय् ब्वये धुंकाःया दकलय् तःधंगु भुखाय् थ्वहे खः धाःगु दु। १९९० सालय् ८ दशमल ४ रेक्टर स्केलया भुखाय् ब्वःगु खः ।

उखे लैनचौरय् बेलायती दुतावासया पःखाः दुनाः स्वम्ह मनू सीगु खँयात कयाः थौं पीडित व स्थानीयवासीत दुतावासय् खँ ल्हाः वंगु दु। उगु इलय् दुतावासपाखें सीपिं मनूतय् छेँजःयात क्षतिपूर्ति, घाःपाः जूपिंत वासः खर्च बीगु लिसें पःखाः बल्लाक दयेकेगु बचं बियाहःगु खँ धाःगु दु ।