भैरवया रथं कुतुं वंम्ह मंत
येँ (सन्ध्या टाइम्स)/नानिचायाः कुन्हु कुमारीया रथ साःबलय् श्री भैरवया रथं कुतुं वनाः घाःपाः जूम्ह भाजु सुनिल शाक्य थौं सुथय् मंत। मदुम्ह शाक्य स्वय्म भैरव जुयाबिज्याःम्ह द्यःभाजु रुजन शाक्यया कका खः ।
४४ दँ दुम्ह भाजु शाक्य नानिचायाः कुन्हु रथय् हे च्वनाः चाःहिलाच्वंगु खः। वंघलं मखं वनेथाय् रथ सालाहःबलय् छखा छेँय् न्यानाः वय्कः रथं कुतुं वंगु खः। रथं कुतुं वनाः छ्यनं चूम्ह वय्कःयात तुरुन्त वीर अस्पताल यंकूगु खःसा घौछि लिपा तिनि अन वासः याये फइ मखु धायेवं चाबहीया ओम अस्पतालय् यंकूगु खः। तर अन नं वासः जुइ मखु धाःगुलिं बाँसबारीया न्यूरो अस्पताल यंकूगु खः। अन तुरुन्त अपरेशन याःगु खःसां वय्कःयात म्वाके धाःसा मफुत ।
मदुम्ह शाक्यया दाजु लिसें द्यःभाजु रुजनया अबु उत्तम शाक्यं वीर अस्पतालया लापर्वाहीं यानाः नं वय्कःयात बचे याये मफुगु बिचाः 'सन्ध्या टाइम्स'यात कनादिल। कार्गो व्यवसायी शाक्य येँया यतखा बहालय् च्वनीम्ह खः। वय्कःया जहान लिसें छम्ह काय व छम्ह म्ह्याय् दी।
नानिचा याः कुन्हु वय्कःयात रथं कुतुं वंगु खनेवं रथय् च्वनाबिज्याःम्ह द्यःभाजु नापं चिन्तित जुयाबिज्याःगु खः ।
मदुम्ह शाक्यं वकुन्हु थः नं कुमारीछेँय् वनाः राष्ट्रपतिलिसें तुं सिन्हः तीगु इच्छा यानाच्वंगु खँ उत्तम शाक्यजुं कनादिल ।
