थिमिइ जेसीजया प्रशिक्षण
थिमि (सन्ध्या टाइम्स)/नेपाल जेसीजया ग्वसालय् मध्यपुर जेसीजया ब्वनाय् निन्हुयंकं न्ह्याःगु जेसीज प्रशिक्षण तालिम क्वचाल। ज्याझ्वलय् नेपाली कांग्रेसया ल्याय्म्ह नेता गगन थापा व नेकपा (एमाले)या ल्याय्म्ह नेता योगेश भट्टराईपिंसं नेतृत्व विकास सम्बन्धी तालिम बियादीगु खः ।
नेपाल जेसीजया निन्हुयंकं जुइगु क्षेत्रीय 'ग' सम्मेलनय् येँ, यल, ख्वप, काभ्रे नापं नीखुगू जेसीज शाखातपाखें स्वसःम्ह जेसीतय् सहभागिता दुगु खः। सहमति, सहकार्य, एकताया आवश्यकता, इमान्दारिता, निष्पक्षता व पारदर्शिताया प्रतिवद्धता बारे सहभागीतय्त प्रशिक्षण बिउगु खः ।
सम्मेलनया उलेज्या यानादिसें जेसीजया संस्थापक अध्यक्ष व पुलांम्ह पराराष्ट्रमन्त्री एवं राजदूत भेषबहादुर थापां नेपाःया ६०१ म्ह सभासद्त राजनीतिइ अलमले जूगुलिं मुलुकय् विदेशी चलखेल अप्वःगु खः धयादिल।
वय्कलं धयादिल, 'नेपाःया दलत शक्ति प्राप्तिया लागिं जक केन्द्रित जुयाः मुलुकयात निकास बी मफुसें अलमल जुयाच्वंगु दु। थुकिं मुलुकयात संकटय् यंकाच्वंगु हे यलय् अझ विदेशी चलखेल अप्वःगु दु। थुकिं देशय् गम्भीर संकट वःगु खः ।'
उलेज्या समारोहय् थापां २०४७ सालं दछिया दुने एशियाय् हे उत्कृष्ट संविधान तयार यायेफुगु नेपालं आः स्वदँ फुइ धुंकाः नं संविधान तयार याये मफुगु न्ह्यथनादिसें वय्कलं मुलुकयात संविधानबिहिन अवस्थाय् तया तयेगु इलय् थप संकट ब्वलंगु खँ कनादिल ।
संघीयतापाखे इंगित यासें वय्कलं नेपाःया हे भूभागयात अंशबन्डा यायेत स्वयाच्वंगु द्वपं बिसें नेपाःया सामुहिक किपायात बुलुकेत स्वयाच्वंगु द्वपं बियादिल। नेपालय् अझ विधिया शासन वये मफयाच्वंगु न्ह्यथनादिसें वय्कलं संविधानय् नेतृत्व याइम्हेसिया अभाव जुयाच्वंगुलिं यानाः उकिया जिम्मेवारी नेपाल जेसीजया ल्हातय् वःगु खँ कनादिल ।
सम्मेलनय् नेपाल जेसीजया अध्यक्ष महेश दाहालं १८ दँनिसें ४० दँया ल्याय्म्हतय्त जेसीसं आवद्ध यानाः सामाजिक परिवर्तनय् लगे याःगु कनादिल। जेसीज नापं सामाजिक नेतृत्वया विकासय् न्ह्यःने वयाच्वंगु खँ न्ह्यथँसें जेसीजं सकारात्मक परिवर्तन याके फइगु खँ कनादिल ।
उगु ज्याझ्वलय् थिमि जेसीजया अध्यक्ष प्रदिना श्रेष्ठ, सम्मेलनया निर्देशक विजय श्रेष्ठ, केन्द्रीय उपाध्यक्ष अन्तिम गुरुङ नापं थीथी ब्यक्तित्वतय्सं जेसीजया थीथी पक्षयात कयाः ध्वाथुइकादीगु खः ।
