तःमुँज्या तयारी यायेत ज्यापुतय् पार्षद मुँज्या
येँ (सन्ध्या टाइम्स)/थ्वहे वइगु असोज ७ गते जुइगु ज्यापु महागुथि केन्द्रीय समितिया निक्वःगु राष्ट्रिय तःमुँज्याया झ्वलय् शनिवाः जगतसुन्दर ब्वनेकुथी केन्द्रीय पार्षद् मुँज्या जुल ।
उगु मुँज्याय् तःमुँज्याया नितिं जुयाच्वंगु तयारीया बारे संगठन व कार्यक्रम उपसमितिया कजि लिसें मूछ्याञ्जे राजभाइ जकःमि, आर्थिक उपसमितिया कजि बेखानारायण डंगोल, व्यवस्थापन समितिया कजि बाबुराजा प्रजापति, प्रचारप्रसार समितिया लिउकजि रत्नकाजी महर्जनपिंसं थःथःगु समितिपाखें यानावयाच्वनागु ज्याखँया बारे कनादीगु खः ।
येँ महानगर समितिपाखें नायः ई. मोहनकृष्ण डंगोल, किपू नगर समितिपाखें नायः कुलबहादुर महर्जन, यल जिल्ला समितिपाखें न्वकु ज्ञानकुमार महर्जनलिसें थीथी समितिया प्रतिनिधि व केन्द्रीय पार्षद्पिसं नं न्ववानादीगु खः। केन्द्रीय कार्यवाहक नायः राजभाइ ज्यापुया सभापतित्वय् जूगु उगु ज्याझ्वः छ्यांज्ये अनुप सिं सुवालं न्ह्याकादीगु खःसा दुजः मचाराजा महर्जनं (मुसुंबहाः) लसकुस यानादीगु खः ।
