छगू मिनेटया भुखाचं ब्वलंकूगु आतंक

सछिदँय् छक्वः तःधंगु भुखाचं नेपाःयात थीगु खँ चर्चाय् दु। म्हिगः सनिलय् ब्वःगु भुखाचं मनूतय्त थ्वहे धापू लुमंके बिल। छगू मिनेट स्वयां अप्वः सनाच्वंगु उगु भुखाचं आपालं मनूतय् सातो कयाबिल। भुखाचं गन गुलि क्षति यात धइगु विवरण वयां तुं च्वंगु दनि। धन्य, यदि तःधंगु भुखाय् ब्वल धाःसा लखौं जनधनया हन्ताः जुइ धकाः अनुमान यानातःगु स्वनिगःयात थ्व भुखाचं अनुमान याना तःगु ति क्षति मयात। यदि सछिदँय् छक्वः ब्वइ धाःगु थ्वहे खःसा थ्व झी सकस्यां लागिं तःधंगु हे राहतया विषय जुल। मखु धइगु खःसा मेगु तःधंगु विपत्तिया लागिं अझ नं झी पिया हे च्वने मालीगु जुल। छाय् यदि ९० सालया थेंज्याःगु भुखाय् यदि आः ब्वल धाःसा उकिं गुलि तःधंगु नोक्सानी याइ धकाः पिहां वयाच्वंगु अनुमान ला सकस्यां सिउगु हे जुल ।

म्हिगः उलि भुखाय् ब्वःबलय् मनूत गुलि आँटे चायाः उखें थुखें ब्वाँय् जूगु खः, उकियात कयाः धायेगु खःसा यदि तःधंगु भुखाय् ब्वल धाःसा थज्याःगु आतंकं नं यक्वस्या ज्यान कायेफु। छुं जुयाः भुखाय् ब्वल धाःसा मनूतय्सं गज्याःगु सुरक्षाया उपायत नालेमाः धकाः नेपाल रेडक्रस लगायत थीथी निकायतय्सं त्वाःत्वालय् वयाः तालिम बीगु ज्या याःगु खः। अज्याःगु तालिम व जनचेतनाया ज्या वास्तवय् म्हिगः गुलि ज्या वल खः उकिया मूल्यांकन नं सम्बद्ध निकायतय्सं यायेमाः। म्हिगः ब्वःगु भुखाचं सर्वसाधारणयात थज्याःगु तालिम व जनचेतना अझ तच्वयेकेमाःगु आवश्यकता महसुस याकूगु दु। खास यानाः स्वनिगःयात आः थज्याःगु हे उपायतय्सं बाहेक मेगुलिं भुखाय्पाखें बचे याइगु खने मदु ।

More Stories Like this