जब धाः बाजनय् अंग्रेजी धुनया म्येँ हाला हल...

उदाय् समाजया ग्वसालय् वंगु सनिवाः न्हापांखुसी बसन्तपूया महाद्यः पार्वती दबुली न्हापांखुसी गुंला बाजं ब्वज्या जुल। उदाय् समाजया नायः डा. रुपज्योति कंसाकारया सभापतित्वय् जूगु उगु ज्याझ्वलय् समाजया न्यागू गुलां बाजं पुचलं ब्वति काःगु खः ।

असं बाजं खलःपाखें न्ह्यब्वःगु छक्वलं सछिगः बाजं थायेगु ब्वज्या उगु ज्याझ्वःया मू आकर्षण जूगु खः। न्यत तुलाधर समिति गुंला बाजं खलःपाखें जति, ताल धाः बाजं न्ह्यब्वःगु खःसा श्वेत काली ग्वाराय् श्वेत कालीया वर्णन यानातःगु म्येँ हालाः तेबहाः बाजं खलःपाखें सांगिनी ग्वारा व ताम्राकार बाजं खलःपाखें धाः दंगः नाय्खिं नापं भ्वाय्लिन थानाः सितला माजुया म्यँ न्यंकूगु खः ।

जनबहाः बाजं खलः व कसाः तःधं गुथिपाखें की व गिटारय् महासत्व राजकुमारया म्यँ हालाः गुंला बाजं न्ह्यब्वःगु खः। नापं गुथिपाखें दकलय् लिपा पँय्ताः पुयाः ज्याझ्वः क्वचायेकूगु खः। गुंला बाजंयात परम्पराय् जक सीमित मजुइमा धकाः गायक पवित्र कसाःपाखें गुंला बाजंया तालय् आधुनिक अंग्रेजी धुनया नेवाः म्येँ नं न्यंकादीगु खः। धाः बाजंयात न्हूगु कथं छ्यलेगु ल्याखं याःगु उगु फ्युजन प्रयोगयात नं यक्वस्यां ययेकूगु खः ।

ज्याझ्वःया नायः डा. रुपज्योति कंसाकारं दक्वं गुंला बाजंयात एकीकृत यायेगु ताः तयाः थुगु ज्याझ्वः ग्वसाः ग्वयागु खँ कनादिल ।

More Stories Like this