कांग्रेसय् भ्वखाय् ब्वइन

नेपाली कांग्रेसया केन्दि्रय समितिया वैठक याकनं च्वनेत्यंगु दु । उगु वैठकय् कांग्रेसी सभापति सुशिल कोइरालां महामन्त्री प्रकाशमान सिंह मार्फत हालै न्ह्यब्वःगु प्रस्तावयात वहुमतं पारित यायेत स्वयाच्वंगु दु । चुनावं ल्ययातःगु भातृसंगठनतय्त खारेज यानाः न्हूगु ल्ययेगु धाःसां व संस्थापन पक्षया स्वार्थ अनुकुल न्ह्याः वनेत्यंगु देउवा पक्षया द्वपं दु । वंगु प्रधानमन्त्रीया उम्मेदवारीया इलं निसें संस्थापन पक्षनाप तं पिकयाच्वंम्ह कांग्रेसी वरिष्ठ नेता शेरवहादुर देउवा आःया केन्दि्रय समितिया वैठक भातृसंगठनतय्गु खारेज यायेगु प्रस्ताव पारित याकेत स्वयाच्वंपिं संस्थापन पक्षया विरुद्ध ल्वायेत देउवापक्षं तयारी यानाच्वंगु खनेदु । वंगु २१ गते महामन्त्री सिंहमार्फत जनवर्गिय संगठन विघटन यायेमाल धकाः प्रस्ताव तःगु खः । म्याद मदयेधुंकूगु नेपाल तरुण दल, नेपाल महिला संघ, आदिवासी जनजाति संघ व नेपाल प्रजातान्त्रिक सेनामी संघ विघटनयायेत प्रस्ताव तःगु खः । थुया कन्हय् खुन्हु जूगु वैठकय् देउवा पक्षयाःपिं सं प्रतिकार यायेवं प्रस्ताव तःम्ह अलमलय् जुइवं सभापति कोइरालां सिंहया प्रस्तावया पक्षय् नवायेगु ज्या जूगु खः ।

चुनावं ल्ययातःगु भातृसंगठनतय्त विघटन यानाः आःयात संस्थापन पक्षया बहुमत दइगु कथं तदर्थ समिति वा महाधिवेशन तयारी समिति दयेकेगु मनसाय दयेकातःगुली देउवा पक्षं छुंनं हालतय् भातृसंगठनत विघटन याके मवीगु स्वयाच्वंगु दु । तटर्थ समिति दयेकाः थःपिनिगु अनुकुल इलय् महाधिवेशन यायेगु मनोस्थिति दयेका वयाच्वंगु संस्थापन पक्षया विरुद्ध उगु समितियात महाधिवेशन तयारी समिति दयेकाः न्ह्यःने वनेमाःगु देउवा पक्षया धापू खःसा संस्थापन पक्षं देउवा पिनिगु मनस्थितियात थुइकाः मात्रै तदर्थ समिति दयेकाः न्ह्याः वनेत स्वयाच्वंगु दु । थ्व निगू विषयया निगू पक्षया फरक स्वार्थ व विचाःया कारणं वइगु केन्दि्रय समितिया वैठकय् भ्वखाय् ब्वइगु निश्चित खनेदु ।

देउवायात प्रधानमन्त्रीया इलय् नं लाःगु देउवाःया धापू दु । सुरुइ रामचन्द्र पौडेलयात चीकाः देउवाः संसदीय दलया नेताया पदं चीकाः थः नेता जुइत स्वःगु खः । थुकिया नितिं देउवां वहुमत संसदतय्गु ल्हाःचि तकं मुंके धुंकूगु खः । लिपा खँल्हानाः पार्टीा सभापति कोइरालां सहमतिया सरकारया नितिं देउवायात उम्मेदवारीया रुपय् थनेगु व वहुमतीय सरकारया नितिं रामचन्द्र पौडेलयात थंगु खः । लिपा छुं भचा समस्या वयेवं वहुमतीय सरकारया प्रधानमन्त्रीया उम्मेदवारय् नं देउवायातहे थनेगु धाःगु खः । तर थःगु पक्षया पौडेलयात थनाः सभापति कोइरालां देउवायात घों लानां त्वःतल । उकियाहे तं देउवां भातृसंगठनत विघटनया प्रस्तावयात छुंनं हालतय् पारित मयायेकेगु स्वयाच्वंगु दु । थ्वहे कारणं यानाः वइगु केन्दि्रय समितिया वैठकय् तसकंहे ल्वापु जुइगु सम्भावना न्ह्यःने वयाच्वंगु खः । नेपाली कांग्रेसया केन्दि्रय समितिइ संस्थापन पक्षया वहुमत दुःसां विघटन यायेत्यंगु अप्वः भातृसंगठनय् देउवा पक्षया पकडय् लानाच्वंगु खः । वैठक जुइवं ल्वापु गन तक्क थ्यनीगु खः ? थ्व धाःसा स्वये ल्यंहे दनि ।

More Stories Like this