देउवायात भातृ संगठनय् नं अल्पमत लाकेगु डिजाइन
येँ (झीगु स्वनिगः)
नेपाली कांग्रेस दुने संस्थापन पक्ष अर्थात सभापति सुशील कोईराला पक्ष व बरिष्ठ नेता शेरबहादर देउवा पक्षधरया दथुइ ल्वापु झन झन तच्वयाः वःगु दु । कांग्रेसया भातृ संगठनत विघटन यायेगु ला कि मयायेगु धैगु विषययात कयाः विवाद ब्वलना वयाच्वंगु खः । भातृ संगठन नेपाल विद्यार्थी संघ, नेपाल तरुण दल, नेपाल आदिवासी जनजाति संघ, नेपाल महिला संघ नापं खुगू भातृ संगठनया म्याद फूगुलिं विघटन यानाः अधिवेशनया माध्यमं न्हूगु नेतृत्व ल्ययेमाः धकाः कोईराला पक्षं अडान कयाः पार्टीया केन्द्रीय कमिटीया मुँज्याय् प्रस्ताव तकं यंके धुंकूगु दुसा देउवा पक्षं धाःसा निर्वाचित जूगुलिं विघटन मयासे हे अधिवेशनय् वनाः न्हूगु नेतृत्व ल्ययेगु ज्या यायेमाः धकाः अडान कयाः वयाच्वंगु खः । भातृ संगठनत देउवा पक्षय् दुगुलिं अथे संस्थापन पक्षं विघटन यानाः वनेगु ग्वसाः ग्वःगु खः धकाः धाःगु दु ।
पार्टीया केन्द्रीय कमिटीइ बहुमत दुगुया नामय् पेलेयाना वन धाःसा केन्द्रीय कमिटीया मुँज्या बहिस्कार यायेगु नाप नापं माल धाःसा अनसन तकं च्वनेगु रणनीति दयेकूगु दु । उकियात देउवा पक्षयात भातृ संगठनय् तकं अल्पमतय् लाकेगु डिजाइन खः धकाः धयाहःगु दु ।
