सभासद् बस्यालपाखें राजीनामा
येँ (झीगु स्वनिगः)
संविधानसभाया दक्ले तःधंगु दल एकीकृत नेकपा -माओवादी)पाखें आन्तरिक रुपं कारवाही यानातःम्ह सांसद् गुणखर बस्यालं थःगु पदं राजीनामा बियादीगु दु । बहुविवाहया द्वपं फयाः वयाच्वंम्ह ताः ई न्ह्यःनिसें संसदय् उपस्थिति हे मजुयाच्वंम्ह सांसद बस्यालं म्हिगः आइतवाः राजीनामा बियादीगु खः । एकीकृत माओवादीया टिकत कयाः प्रत्यक्ष रुपं चुनावय् ल्वानाः त्याकावःम्ह सांसद वय्कलं थःगु व्यवहारपाखें पार्टीया छविइ दाग लगे जुइगु स्वीकार यानादिसें संसद् सचिवालयय् पौ दर्ता यानाः पदं राजीनामा बियादीगु खः ।
सभासद् बस्यालं राजीनामा पत्रया बोधार्थ सिंहदरवारय् च्वंगु एकीकृत माओवादीया संसदीय दलया ज्याकुथिइ नं फ्याक्सया माध्यमं पौ छ्वयादीगु दु । बस्याल संविधानसभाया निर्वाचनय् पर्वत निर्वाचन क्षेत्र नं. २ पाखें प्रत्यक्ष निर्वाचित जुयादीम्ह सांसद खः । येँया ग्वंगःबुँ लागाय् होटल व्यवसाय यानाः वयाच्वंम्ह तामाङ थरया छम्ह मिसालिसे अवैध सम्वन्ध तयाः वयाच्वंगु धकाः द्वपं बियाःतःगु खः । वय्कः ताः ई न्ह्यःनिसें हे माओवादी पार्टीया सम्पर्कं पिने च्वनाः वयाच्वंगु खः ।
