कांग्रेस कार्यकर्ता अनसन च्वनीगु

मंगलवाः च्वनीगु केन्द्रीय बैठक देउवा पक्षं बहिष्कार यायेगु तयारी

येँ( सन्ध्या टाइम्स)/नेपाली कांग्रसया संस्थापन पक्षं खुगू भातृ संगठनया केन्द्रीय समिति विघटन यायेत्यंगु विरोधय् भातृ संगठनया नेतातय्सं पार्टीया मू ज्याकू सानेपाय् अनसन च्वनेगु तयारी याःगु दु ।

पार्टी सभापति सुशील कोइराला नाप जानाः महामन्त्री प्रकाश मान सिंहं नेपाल आदिवासी जनजाति संघ, नेपाल तरुण दल, नेपाल विद्यार्थी संघ, नेपाल भूतपूर्व सैनिक संघ, नेपाल महिला संघ, नेपाल प्रजातान्त्रिक सेनानीया केन्द्रीय कमिटीया म्याद फुइधुंकूगुलिं विघटन यानाः अधिवेशनपाखें न्हूगु नेतृत्व ल्ययेगु प्रस्ताव हयेवं पार्टीया बरिष्ठ नेता शेरबहादुर देउवा पक्षं अनसन च्वनाः आन्दोलन यायेगु तयारी यानाच्वंगु खँ सीदुगु दु ।

कांग्रेसया केन्द्रीय कार्यसमितिया बैठक मंगलवाः सःतातःगु खःसां सभापति कोइराला धाःसा आः तकं विराटनगरं लिहां मवःनि। वय्कः कन्हय् येँय् थ्यनीगु सम्भावना दु। देउवा पक्षं कन्हय् हे वय्कःयात ज्ञापन पौ बीगु व उकियात बेवास्ता यात धाःसा मंगलवाः सःता तःगु केन्द्रीय कार्यसमितिया बैठक थःगु पक्षं बहिष्कार यायेगु सोच दयेकाच्वंगु खँ धाःगु दु। उगु बैठकं भातृ संगठन विघटनया प्रस्ताव बहुमतं पारित याइगु सम्भावना दु ।

शान्तिपूर्ण व अनुशासित जुयाः आन्दोलन यायेगु तयारीया झ्वलय् म्हिगः देउवा पक्षया नेतातय्गु जक बिस्कं बैठक जूगु खः। उगु पक्षया थ्व स्वक्वःगु बिस्कं बैठक खः।
कांग्रेसया भातृ संगठनत अप्वः यानाः देउवा पक्षया कब्जाय् दुगुलिं हे संस्थापन पक्षं पार्टीया बहुमत छ्यलाः उकियात भंग यायेगु तयारी यानाच्वंगु देउवा पक्षया द्वपं दु। थःपिंत बहुमतया बलं पेले यायेत्यंगु जुयाः हे देउवा पक्ष आक्रमक रुपं प्रस्तुत जुइत्यंगु खँ धाःगु दु। सूत्रं धाः कथं संस्थापन पक्षं खुगुलिं भातृ संगठन विघटन यानाः तदर्थ समिति दयेकाः अधिवेशन यायेगु अले उगु तदर्थ समितिइ च्वनीपिं मनूत निर्वाचन ल्वाये मदइ कथंया प्रावधान हयेगु कुतः यानाच्वंगु दु ।

कांग्रेसया ताः इलंनिसें न्ह्यानाच्वंगु केन्द्रीय कमिटीया बैठकय् संस्थापन पक्ष व देउवा पक्ष दथुइ भातृ संगठनयात कयाः कचमच जुया वयाच्वंगुलिं निर्णय याये मफयाच्वंगु खः। कांग्रेस दुने आः पिहां वःगु विवादं पार्टी एकीकरण जुइ न्ह्यःया नेपाली कांग्रेस व नेपाली कांग्रेस (प्रजातान्त्रिक) या भू हानं सी दयेकः वःगु खँ नं सूत्रं धाःगु दु। तत्कालिन गिरिजा कांग्रेस व देउवा कांग्रेस लिपा एकीकरण जूसां उमि दथुइ भावनात्मक एकता धाःसा अझं मजूनिगु व उकिया हे लिच्वः कथं तत्कालिन निगू पार्टी आः निगू गुटया रुपय् खने दया वःगु खँ नं सूत्रं धाःगु दु ।