सिक्किमय् बाखं गोष्ठी
सिक्किम नेवाः गुथि व नेपालं वंगु बाखं दबूया मंकाः ग्वसालय् सिक्किमया राजधानी गान्तोकय् 'नेवाः जातिया परम्परा व संस्कृति' विषयय् प्रवचन व बाखं गोष्ठी जुल। नेपालभाषाया बाखं साहित्य च्वन्ह्याकेगु व देशं पिने च्वंपिं साहित्यकारतलिसे साहित्यिक अन्तर्क्रिया यायेगु ताः तयाः उगु ज्याझ्वः जूगु खः ।
सिक्किम सरकारया मानव संशाधन मन्त्री एन.के. प्रधान मूपाहां कथं झाःगु उगु ज्याझ्वलय् बाखं दबूया नायः लक्ष्मण राजवंशीं नेवाः संस्कार व संस्कृतिया बारे ध्वाथुइकादीगु खः ।
उगु ज्याझ्वलय् नेपालं वंपिं बाखं च्वमिपिं प्रा. नर्मदेश्वर प्रधान, राजा शाक्य, लक्ष्मण राजवंशी, शशिकला मानन्धर, गणेशराम लाछि, केदार सितु, गोविन्दमान श्रेष्ठ, शरद कसाः, बद्री वेदना, कृष्णभक्त बोडे, विमला शाक्य व मोहिनी चित्रकारपिंसं थःपिनि बाखं ब्वनाः न्यंकादीगु खः ।
उकथं हे सिक्किमय् च्वंपिं साहित्यकारत राज के. श्रेष्ठ, प्रविण राई 'जुमेली', मय्जु बीणश्री खरेल, प्रद्युम्न श्रेष्ठपिंसं नं थःपिनि रचना पाठ यानादीगु खः। अन ब्वंगु बाखंयात कयाः सिक्किमया नांजाःम्ह साहित्यकार पद्मश्री सानु लामां समीक्षा यानादीगु खः ।
सिक्किम नेवाः गुथिया मू संरक्षक के.सी. प्रधानया सभापतित्वय् जूगु उगु ज्याझ्वलय् नायः आर.के. प्रधानं न्ववानादीगु खः। ज्याझ्वलय् कल्पना प्रधानं लसकुस यानादीगु खःसा भानुप्रकाश मास्कें सुभाय् बियादीगु खः। उगु हे ज्याझ्वलय् नेपालं झाःम्ह कलाकार पवित्र कसां सिद्धिदास बुन्हिया ब्यांचुलि म्येँ नं हालाः न्यंकादीगु खः।
ज्याझ्वलय् बाखं दबूपाखें सिक्किम नेवाः गुथियात मतिनाया चिं कथं तग्वःगु सुकुन्दा लःल्हाःगु खःसा ज्याझ्वःया पाहांपिंत हाकुगु तपुलिं सम्मान याःगु खः ।
