प्रधानमन्त्री देशभक्त हे जुइमाल

डी.आर. खड्गी

पश्चिमी राष्ट्र व अमेरिका विश्वया धनी देश खःसां इमिसं मन्त्रीमण्डल गठन यायबलय् तसकं म्हो जक संख्या तयेगु याइ। करिब १४-१५ म्हया ल्याखय् मन्त्री मण्डल गठन यानाः देश संचालन याइ। धनी देश जूसां छाय् जम्बो मन्त्रीमण्डल दयेकाः संख्या अप्वः तयेगु ज्या मयात? थुकी झीगु देय्या नेतातय्सं विचाः यायेमाः। जम्बो मन्त्री मण्डल गठन यानाः देशया प्रशासन सहज रुपं संचालन याये फइ मखु। देश सुचारु रुपं संचालन यानाः उन्नति व प्रगतिया लँय् वनेत ला चेतनशील दिमाग माः। यदि सक्षम, विवेकी, देशभक्त नेतातय्सं देश संचालन यायेगु खःसा याउँक हे देशया उन्नति व प्रगति जुइ। यूरोप व अमेरिकाया मन्त्री मण्डलया दुजः व सल्लाहकारकथं सक्षम, विवेकी व बुद्धिमानपिंत पाटीं नियुक्त याइगुलिं इमिगु देशय् प्रगति जूगु खः। इमिगु देशय् नेतात संवेदशील, विवेकी जूगुलिं अवसरवादी व असक्षम नेतातय्त देश संचालन यायेगु मौका बी मखु। उकिं हे अनया जनतां पार्टीतय्त विश्वास याइगु खः। पार्टीं नं जनताया विश्वासयात ध्यानय् तयाः देश व जनताया कल्याण यायेगु भिजन दुपिं नेतातय्त देश सेवा यायेगु ह्वःताः बीगु ज्या याइ। यूरोप व अमेरिकाय् जक मखु हलिंया आपालं देशय् पार्टी आबद्ध जुयाच्वंपिं नेता व कार्यकर्तात द्वलंद्वः दयाच्वनी। पार्टीया नेतात बांलाःपिं वा बांमलाःपिं धयागु व इलय् प्रस्ट जुइ, गुगु इलय् पार्टीया ल्हातय् सत्ता संचालन यायेगु ह्वःताः वइ। व इलय् सक्षम, विवेकी व इमान्दार नेतातय्सं देश सेवा यायेगु ह्वःताः बीफत धाःसा पार्टीया नेतात बल्लाःपिं खः धकाः पुष्टि जुइ। यदि अवसरवादी व असक्षम नेतातय्त पार्टीं देश संचालन यायेगु ह्वःताः बिल धाःसा व पार्टींया नेतात बल्लाःपिं मखु धकाः थुइकेमाः। हलिंया आपालं देशय् विशेष यानाः अफ्रिका व एशियाया देश बर्वाद जुयाच्वंगु नं असक्षम, अविवेकी व विदेशीया ईशाराय् प्याखं ल्हुइपिं नेतातय्सं देश संचालन याःगुलिं हे खः ।

"कहिं नभएको जात्रा हाँडी गाउँमा" धाःसां उगु जात्रा हाँडी गामय् जक मखु देय्या समग्र राजनीतिइ हे जुयाच्वंगु दु। नेपाःया उच्च पद (सभासद) य् लाकां सुइपिं, चुरा मीपिं, वसः सुइपिं, भाडा सिलाः जिवीका चले यानाच्वंपिं जक मखु अपाङ्गता दुपिं मनूत नं थ्यनाच्वंगु दु। अज्याःगु वर्गय् च्वंपिं नं सभासद् पदय् थ्यंके मजिउ ला मखु तर देशया उच्च पदय् सक्षम व विवेकीतय्त छ्वःसा उमिगु जक मखु देशया नं कल्याण जुइगु खः। नेपाःया संविधानसभाय् अशिक्षित, अनुभव हे मदुपिंत पार्टीया नेतातय्सं सभासदया रुपय् छ्वयाः नेपाःया राजनीतियात हे दुषित यानाच्वंगु दु। वास्तवय् धायेगु खःसा नेपाःया राजनीतिक ख्यलय् च्वय् उल्लेख जुयाच्वंपिं जक मखु ९० प्रतिशत असक्षम व गुन्डागर्दी राजनीति याइपिं थ्यनाच्वंगु दु। देशया उच्च पदय् असक्षम, स्वार्थी, लोभी व अनुभवहीन व्यक्तित थ्यनाच्वंगुलिं उमिसं छुं ज्या याये मफयाच्वंगु खः। पार्टी संचालन यानाच्वंपिं हे स्वार्थी, लोभी व भिजन मदुपिं जूसां नं राजनीतिक पार्टी चायेकाः थःगु पकडय् तयातःगुलिं खः। नेपाःया राजनीति संचालन यानाच्वंपिं स्वार्थी लोभी नेतातय्सं जक मखु अझ विहारीत नं राजनीति यानाः उच्च पदय् च्वनाच्वंगु दु। स्वार्थी, लोभी खसब्रम्हू व विहारीतय्सं राजनीतिया नामं देश बर्वाद यानाच्वंगु दु। थ्व निथ्वः वर्गं राजनीतिया नामं जनतायात झंगः लायेत अनेककथं नाटक म्हिताच्वंगु दु। झीगु देशया मन्त्री अथवा सभासद जुइत शिक्षित वा राजनैतिक रुपं परिपक्व जुइमाः धयागु मदु। खालि पार्टीया सदस्यता कयाः दादागिरी, गुन्डागर्दी याये फयेमाः अले पार्टीयात माक्व चन्दा बी फयेमाः, थुल जुल धाःसा वयात ला पदय् थ्यंकेत सुनां पनीगु? थथे जुयाः हे नेपाःया उच्च पदय् आपराधिक गतिविधि न्ह्याकाच्वंपिं व विहारी मूलया मनूत अप्वः मात्राय् थ्यनाच्वंगु खः। निक्वःगु सफल जनआन्दोलनं भारतमुखी मधेशीवादी दलतय्सं अप्वः फाइदा काःगुलिं जनता अति पीडीत जुयाच्वंगु दु ।

नेपाःया जनतां खसब्रम्हू नेता व मधेसवादी नेतातपाखें देशया लागिं छुं जुइ धकाः आशा हे मयाये धुंकल। बरु जनता सिक्किमया नेता लेन्दुप दोर्जें थें नेपाःयात नं भारतय् हे गाभे याना छ्वइगु जकं खः लाकि धकाः ग्यानाच्वंगु दु। छाय्धाःसा नेतातय्सं खालि भारतया 'गेम प्लान'यात ग्वाहालि जुइगु गोटी थें जक जुयाः ज्या यानाच्वंगु दु। जनयुद्धया इलय् माओवादी पार्टीं तच्वयेक राष्ट्रवादी व जनजीविकाया नारा ल्ह्वनाः जनताया मन त्याकेत छुं हद तक सफल जूगु नं खः। थथे हे जूगुलिं जनतां संविधानसभाया चुनावय् माओवादीयात अप्वः सिट बियाः त्याकल। गुगु इलय् माओवादी सत्ताय् वन काँग्रेस व एमालें भारतया न्ह्यःने क्वमिलु जुयाः क्यन। खतुं भारतलिसे टकर कायेमाःगु ला मखु तर भारतया थिचोमिचोया विरोध धाःसा यायेमाः। प्रचण्डं झलनाथ खनालयात प्रधानमन्त्री यायेत ग्वाहालि याःगु इलय् बुद्धिजीवीतय्सं धाःगु नं खः झलनाथ खनाल नेपाःया स्वतन्त्र प्रधानमन्त्री जुइत ताःलात धकाः। छाय्धाःसा गुलि नं प्रधानमन्त्री जुल, फुक्कसित भारतया आशिर्वाद दयाच्वन। झलनाथ व प्रचण्ड जानाः देशय् छुं छुं ज्या यायेगु कुतः नं यात। तर भारतया षड्यन्त्रं यानाः थ्व ज्या ताःमलात। भारत व इलय् थारान्हुल गुगु इलय् चीनं लुम्बिनीयात अन्तर्राष्ट्रिय बौद्ध केन्द्र दयेकाः नेपाःया पहिचान व गौतम बुद्ध नेपाःया सपुत खः धकाः विश्वया न्ह्यःने प्रस्तुत यायेगु तःधंगु योजना न्ह्यःने हल। थ्व योजना ताःमलाकेत भारतं प्रचण्डयात दबाव बिउगुलिं झलनाथ प्रधानमन्त्री पदं राजीनामा यायेत बाध्य जुल, तर लिपांगु इलय् जूगु प्रधानमन्त्रीया चुनावय् भारतं मधेसवादी दलतय्त ईशारा यानाः बाबुराम भट्टराईयात प्रधानमन्त्री पदय् त्याकेत ताः लात। बाबुराम भट्टराईया लागि थ्व परीक्षणया घडी खः। यदि देशभक्त प्रधानमन्त्री धायेकेगु खःसा जनतायात शक्तिशाली याइगु संविधान निर्माण यायेमाः। जनता शक्तिशाली जुइगु संविधानयात ध्याकुनय् तयाः मधेवादी दलतय्सं धाःधाःथे यात धाःसा देशय् तःधंगु संकट वइ ।

drkhadgi@gmail.com

More Stories Like this