तच्वयावःगु माओवादी विभाजनया ख्याच्वः

२०४६ साल लिपा सत्ताय् थ्यंगु हरेक पार्टी शक्तिया खँय् विवाद जुयाः निकू कुचा जुइगु परम्परा थौंकन्हय् सत्ताय् च्वनाच्वंगु एनकेपा (माओवादीं) दुने नं लागू जुइगु खः लाकि धइगु ग्याःचिकु ब्वलंगु दु। माओवादीया वरिष्ठ नेतातय्सं थौंकन्हय् न्हिंन्हिं धइथें न्ववाइबलय् 'यदि...' धासें पार्टी विभाजन नं जुइफु धकाः तप्यंक हे धायेगु याना हयाच्वंगु दु। पार्टीया असन्तुष्ट पक्षं बीगु थज्याःगु ख्याच्वःयात संस्थापन पक्षं नं गम्भीरतापूर्वक कायेगु मयासे 'त्वःता वने न्ह्याःसा त्वःता वंसां जिउ' धकाः धायेगु याना हयाच्वंगु खनेदु। थ्व अवश्य नं बांलाःगु खँ मखु ।

नेपालय् पार्टी विभाजन व एकताया इतिहास छुं न्हूगु विषय मखु। उकिसनं वामपन्थीतय् सवालय् थ्व इतिहास छगू नियमित प्रक्रिया थें हे जुयाच्वंगु दु। तर थौंया खुल्ला प्रतिस्पर्धाया युगय् पार्टी विभाजन धइगु न्हापा पंचायतकालय् थें मखु। पंचायतकालय् पार्टी विभाजन जुइ, थःथःगु कवः ली, सिधइ। तर आः चुनाव जुइबलय् पार्टीतय्सं उकी ब्वति नं कायेमाः। विभाजित पार्टीत न्ह्याबलें नं शक्तिं पिने लाये मालाच्वंगु इतिहास दु। नेकपा (एमालें) छगू विभाजनं हे चेत नयेधुंकल। आः माओवादीं नं विभाजनया त्वहः मालाच्वंगु खःसा वयागु हविगत पुलांगु विभाजित एमाले स्वयां नं खराब जुइगु खँय् निगू मत मदु। उकिसनं थौंया इलय् सेना समेत दुगु पार्टी विभाजित जुल धाःसा उकिया लिच्वः गुलि भयानक जुइ धइगु खँ अथें नं अनुमान यायेफु। आःया इलय् माओवादी विभाजित जुल धाःसा वयागु लडाकु नापं विभाजित जू वनी। थ्व खँया गम्भीरतायात माओवादी जक मखु मेपिंसं नं मनन यायेमाःगु खनेदु ।

More Stories Like this