निहत्था समायोजनया अर्थ छु ?

मदत्त वराल

नेपाःया राजनीतिइ यथास्थितिवादी तय्सं बांलाक्क तालं ग्वयेत ताःलाःगु दु । जनसेनां प्रतिकृयावादीतय्गु नापं साख वचय् यात, खुसि छित तुतां लोहमंकल । अथ्यसां धायेमाः ज्ञानेन्द्रं थुपिं वहुदलतय्गु खिचा लगय् यानाः धोंतय्त थें ख्यात । गुनं गुन नइ, जिं छन्त नये थें यानाः जनसेनाया अस्तित्व छुइत ज्यूच्यानं लगय् जुयाच्वन । झिंनिगूबुंदे सहमति नेकपा माओवादीया नितिं जरुरी मखु । सरासर वहुदलतय्गु आख ल्यंकेत जूगु झिंनिगू वुंदे सहमतियात थुपिं प्रतिकृयावादी वहुदलेतय्सं जिद्धि यानाः याकूगु खः । सेनाय् भर्ना चायेकेःथें छम्ह छम्हसिगु क्षमता व योग्यताय् जक सुरक्षा निकाय्लय् समावेश यायेगु धकाः धयाच्वंगु दु । म्हिगः बूपिं थुपिं बेहमानीत छगूहे माघं चिकुला बिसुकः छ्वयेत स्वयाच्वंगु दु । हालय् वयाः माओवादीया पौरखय् थुपिं वहुदलवादी व बचय् जूगु खः । थुमित ला ज्ञानेन्द्रं वैतरणीपार याकेत तयारी याये धुंकूगु खः ।

धात्थेंला कांग्रेसीइ न्याय् सम्पादनया छगू सूत्र बरावर छ्यलेगु याइ । म्भबिथ मभाभभत तजभ भत्रगष्तथ अर्थात लिवाक्क निर्णय यायेगु धयागु थुकिया मूल्य थःथव्यया मर्म सी । शक्ति सम्झौता जूगु ताःहाकःगु ई तक्क सेना समायोजनया पक्षय् ध्याक्वय् लायेवं उगु म्वाःपिं सहिदतय्त अन्याः जुयाच्वंगु दु । इमित अनादर यायेगु ज्या जुयाच्वंगु दु । नेपाली कांग्रेस व एमालें हदै तक्कया अपमान यानाच्वंगु दु । मानौ कि व जनसेना धयागु युद्ध ल्वायेगु मेसिनरी सेवा त खः । थुपिं माओवादीया जक ल्वानाः खः । माओवादीं संकीवलय् जक मनीपिं । वन्द यानाः शिखरय् तःसा शिवरय्हे च्वनी, तर खँ अथ्य मखु । थ्व नं मानवीय प्राणी खः । थुमिके नं मानवीय सम्वेदना म्वाःथे च्वं । थुमिके देश प्रेम दु । जन्मभूमिप्रति यक्को यक्कों माया ममता दु । व माल धाःसा राजनीतिक दर्शन व अनुशासनया सग्रहालयं पनेफैमखु । अपमानया जःलय् ब्वाक ज्याःगु विद्रोह अनुशासित मजुइफु ।

विध्वंस सम्पत्ति समानया पःखालं पने फैमखु । एमाले व नेपाली कांग्रेसं थुपिं जनसेनायात सीमाः पुलाः हे अपमानया पीडा वियावयाच्वंगु दु । एकीकृत नेकपा -माओवादी) नं थुगु पक्षय् प्रसस्त कमी कमजोरीत खनेदत । सुरुया अवस्थाय् हे छु गुलि संख्याय् सुरक्षा निकायय् समायोजन याये फैगु संख्या पक्का यायेमाःगुली, मयासे कमजोरी जुल । थुलि संख्यायात छु गुलि खर्च सुविधा वीगु धयागु यानाः समस्याय् सामाजिकरण यायेगु व छु गुलि हे दुने ज्या क्वचायेकेगु धयागु खँय् योजना दयेमाः छलफल यायेमाःगु खः । पिने वजारय् खँ प्रचार मानथें गिरिजा नाप न्याद्वः समायोजन यायेगु धाल हं । क्यासेटं नं छु खँ वजारय् न्यंकाविल । माओवादीं क्रान्तियात व्यवस्थित रुपं न्ह्यःने यंकू थें जनयुद्धयात विस्थापन यात धाःसा लिपाया इलय् पोख्त व व्यवस्थित रुपं ज्या यायेत ढंग मगा थें जुल । चा वन खँ वन धाइ । ई वनेवं समस्यां हा काइ । ईया अन्तरालय् बांलाःगु बांमलाःगु निगुलिं पक्षं कचा पिकाइ, धात्थेंला लिवातकिं नेपाली कांग्रेसं जाः दयेकेत माका काल । आः आन थाकुयाः वंगु दु । व्यक्तिगत रुपय् निहत्था व निरिह जुयाः सामन्ती संस्कारय् ब्वलंपिं नेपाली सेनानापया सहवास व सहयात्रा निश्चयनं जनसेनाया नितिं अपमान जुइ । डा. प्रकाश चन्दं धाःथें विजुली भारत थें यानाः व्यागलं सेना दयेकेत थुपिं प्रति कृपावादीं स्वीकार याइगु छाँटकाँट मदु उकिं व्यागलं वटालियन दयेकेगु ल्वाभः विस्थापन यायेमाःगु व अल्पमत लानाः नेपाली सेनाया मातहत च्वनेवं व तयेवं जनसेनाया मानमर्दन जुइगु निश्चित दु । उकिं स्वतन्त्र वातावरण दयेका वीगु बांलाइ । अपमानजनक पारां सेनाय् जनसेनायात छ्वयेगु धयागु जनसेनाया साख क्वतुंकेगु जक जुइ ।

शान्ति पलिस्था व कब्जा यानातःगु छेँ बुँ सम्पत्ति लितमव्यूतले संविधान दयेकेमवीगु थ्व वहुदले प्रतिकृयावादीया सोच धात्थेंला प्रतिगमनकारी सोच खः, न्हापा दयेकूगु संसदीय समितिं छेँ जग्गा सम्पत्ति लित वीगु ज्या पूवंकेगु माःगु खः । फुक्क ज्याया जिम्मेवारी माओवादीयात दयेकेगु प्रतिकृयावादी सोचं हे थौंतक्क शान्ति स्थापना जुइमफैगु व संविधान दयेके मफुत यथार्थ खँ फुक्क पक्षं थुइकेमाःगु खः । तर थुज्वःगु राष्ट्रिय महत्वया पक्षय् न्ह्यावलें उदासिन जुइगु गैर जिम्मेवार पार्टी नेपाली कांग्रेस व उयाहे कका किजा एमाले नेपाःया घाटक दलया रुपय् न्ह्यःने वःगु दु । आः धाःसा एकीकृत नेकपा माओवादीं फुक्क खँयात धायेवलय् जनसेनायात आर्थिक प्याकेजया व्यवस्था यानाः सामाजिकरण यायेगु व प्राप्त आर्थिक प्याकेजं उपयुक्त उद्योग संचालन यानाः देश व जनताया सेवाय् समर्पित जुइगु ज्यायात हे प्रधानता वीगु वेश जुइ । अपमानजनक रुपय् नेपाली सेनाया अर्दलीया रुपय् समायोजनया खँयात सिचय् तयावीगु उपयुक्त मखु । जनसेनाया विसर्जन व विस्थापन लिपाया सम्भावित प्रतिक्रान्तिया विषयलय् सचेत जुइमाः । थुकिया भारला थुपिं नेपाली कांग्रेस व एमालें काइमखु । अय्सां नं वस्तुस्थितिया जिकिर यानाः तया तयेगु नं उलिहे आवश्यक दु । धात्थेंला थुपिं संसदीय दलया ठालुत नेपाली कांग्रेस व एमालें एकीकृत नेकपा माओवादीयात फक्को दनेहेमफयेक गालय् क्वफायेत्तु स्वयाच्वंगु दु । सेना समायोजन व छेँबुँ सम्पत्तिया खँ हे एकीकृत नेकपा माओवादीयात त्यानुकेगु षडयन्त्र यानाच्वंगु दु । थुगु संक्रमणकालिन अवस्थाय् थः दुनेया अन्तरविरोध घातक जुयाच्वंगु दु । याकनं समायोजन यानाः धात्थेंहे एकमतया पार्टी जुइमाः । मखुसा खतरा दु ।

More Stories Like this