नेवाःतय्गु नितिं अर्थमन्त्रीया बचं

हालै नेवाः स्वायत्त राज्य मंकाः संघर्ष समितिया ग्वसालय् वइगु आ.व. २०६८/०६९ या बजेटय् नेवाःतय्गु भाषा, साहित्य संस्कृति व जातिया नितिं व्यवस्था यायेमाल धकाः अर्थमन्त्री वर्षमान पुन अनन्तयात संस्थागत थीथी प्रतिनिधि व पदाधिकारीतय्गु पहल वंगु उगु पुचःयात अर्थमन्त्री वर्षमान पुनं संघर्ष समितिया सुझाव व मागयात कदर यासे नेपालभाषाया नितिं अलगहे वजेटया व्यवस्था यायेगु खँय् सकारात्मक लिसः व्यूगु दु । थौं नेपालभाषाया स्थितिं सन्तोषजनकरुपं न्ह्याः वनाच्वंगु मदु । भाषा, जाति निसें कयाः साहित्यिक, सांस्कृतिक, सामाजिक हरेक क्षेत्रय् समस्या दु । समस्या धयागु समस्याहे खः । राज्य व्यवस्थां सम्वोधन मयाःगु नेपालभाषाया समस्या विकराल दु । भाषाया ख्यलय्हे विकराल समस्यात वयाच्वंगुलिं साहित्यीक ख्यःनं धिजांमिजां दनीगु स्वभाविक खः । साहित्यय् ब्वनीपिनिगु समस्या दु, इमिगु ल्याः न्हिन्हिथं म्हो जुजुं वनाच्वंगु दु । उकीसनं लगानी याइपिनिगु अभावं साहित्यकीक ख्यः धिजोमिजों दनाच्वंगु खः ।

अथ्यहे पत्रपत्रिकाया ख्यलय् नं समस्या म्हो मदु । न्हिपौ निगू, वाःपौ निगू अले छुं लय्पौ वाहेक मेमेगु पत्रपत्रिकात पिहां वयाच्वंगु मदु । तर न्हिपौ पिकायेगु ज्या तसकं थाकु । माक्को विज्ञापन मवइगु कारणं आर्थिक रुपं न्हिपौ पिकाये तसकं थाकुया च्वंगु दु । विज्ञापनया हे कारण यक्को पत्रिकात पिहां वयाःनं बन्द जूगु दु । पत्रिका पिकायेगु धयागु जनताया मिखा कंकेगु खः । राज्यया स्वंगूगु मिखा धाइगु पत्रिकाया उदेश्य छगूहे जुइ मखु । छुं पत्रिकाया उदेश्य व्यापार याइगु जूसा छुं छुं पत्रिकाया उदेश्य नेवाः नुगः ब्वंलेकेगु खः । नेवाःतय्गु भाषा साहित्य संस्कृतिया चिउताः तइपिसं पत्रपत्रिकाया नं चिउताः कयेमाः । नेवाःतय्गु न्हाय् तयेगु ज्या थ्वहे न्हिपतिं यानाच्वंगु दु । भाषाया स्थिति गनथ्यं धयागु खँ थ्वहे न्हिपतिं याइ ।

गुलि अप्वः थासय् न्हिपतिं थाय् काइ, विकास, भाषा भाषीतय्गु चेतनाया स्तर आदि नं थ्वहे पत्रिकां बांलाक्क क्यनी । उकिं भाषाया साहित्यीक पत्रपत्रिका स्वयाः अप्वः ध्यान न्हिपतिं बीगुली, राज्यस्तरं पत्रपत्रिकाया नितिं ठोस व कल्याणकारी विज्ञापनय् व्यवस्था यानावीमाः । अथ्यला राज्य स्तरं ग्वाहालि याये धयां नं मयाःगु यक्को दसित मदुगु मखु । उकीसनं म्हस्यूपिन्त व थःथितिपिन्त जक ग्वाहालि याइगु झीगुथें याःगु समाजय् मन्त्रीं धाःथें वजेटया व्यवस्था यात धाःसा नेवाःतय्गु नितिं तःधंगु ग्वाहालिं जुइ । अथ्य धकाः संस्कृति व नखः चखःया नितिं वजेटया व्यवस्था जूसां व सकारात्मक म्हो व नकारात्मक अप्वः जूवंगु दु । थुगु पृष्ठभूमिइ अर्थमन्त्रीया वचं सकारात्मक न्ह्यःने वनीगु आशा यायेफु ।

More Stories Like this