आः ज्यापुत नेवाः स्वायत्त राज्यया नितिं न्ह्याः वनेत तयार जुइगु
येँ (झीगु स्वनिगः)
ज्यापुत आः नेवाः स्वायत्त राज्यया नितिं न्ह्याः वनीगु जूगु दु । म्हिगः शनिवाः ज्यापु महागुथिया निक्वःगु राष्ट्रिय सम्मेलनया तयारीया झ्वलय् केन्द्रीय पार्षद्तय्गु मुँज्यां 'नेवाः स्वायत्त राज्यया नितिं ज्यापु महागुथिया निक्वःगु राष्ट्रिय सम्मेलन' धैगु नारा तयार याःगु दु । वइगु असोज ७ गते येँया सामाखुसी लागांनिसें सांस्कृतिक बाजं नापं र्याली पिकयाः तोखाय् वनाः अथे राष्ट्रिय सम्मेलन यायेगु नितिं माःगु तयारीया बारे म्हिगः पार्षद्तय्गु दथुइ सहलह ब्याकूगु खः ।
उगु सहलह ज्याझ्वलय् राष्ट्रिय महाधिवेशनय् 'इलय् हे संविधान जारी यायेमाःगु, संघीय गणतन्त्र, नेवाः स्वायत्त राज्य, नेवाः स्वायत्त राज्य दुने ज्यापुतय्गु समानुपातिक प्रतिनिधित्व, देय्या समस्या समाधानया नितिं न्ह्याः वनेगु' लगायतया बारे नं सहलह जूगु खः । ज्यापुतय्गु सांस्कृतिक बाजंयात राष्ट्रं मान्यता बिइमाःगु, ज्यापु वसःयात राष्ट्रिय मान्यता बिइकेगु नितिं माःगु कथंया भूमिका म्हितेगु विषययात कयाः नं सहलह जूगु खः धकाः जानकारी ब्यूगु दु । अथे हे आःया अवस्थाय् संघीयतायात ल्वयेक ज्यापु महागुथिया सांगठनिक संरचना दयेकेगु विषययात कयाः विधान समितिइ नं सहलह जुयाच्वंगु दु धकाः ज्यापु महागुथिया छम्ह केन्द्रीय दुजलं जानकरी बियादीगु दु । ज्यापु महागुथिया थुगुसीया सम्मेलनं न्हूगु नेतृत्व नं ल्यइगु जूगु दु ।
