उपकुलपतियात किपूमितपाखें ज्ञापन पौ

किपू (झीगु स्वनिगः)

नेवाः स्वायत्त राज्य मंकाः परिषद् किपूपाखें वंगु शुक्रवाः त्रिभुवन विश्वविद्यालयया उपकुलपति प्रा. डा. हिराबहादुर महर्जनयात किपूमितपाखें ज्ञापन पौ बिइगु ज्या जूगु दु । किपूमितय्सं ५० दँ न्ह्यःनिसें निरन्तर रुपं थःपिनिगु हक अधिकारया नितिं यानाच्वंगु आन्दोलनया झ्वलय् न्ह्यब्वया वयाच्वंगु मागयात हे १५ सूत्रीय माग कथं मंकाः परिषद्ं ज्ञापन पौ माध्यमं लःल्हाःगु खः । नेवाः स्वायत्त राज्य मंकाः परिषद् किपूया नायः पुचःया कजि पञ्चलाल महर्जनं लःल्हानादीगु उगु ज्ञापन पौयात कयाः उपकुलपति प्रा. डा. हिराबहादुर महर्जनं थःनं किपूमि हे जूगु खँ न्ह्यथसें माग सम्वोधनया नितिं कुतः यायेगु बचं बियादीगु खः ।

ज्ञापन पौ बिइत मंकाः परिषद्या नेता व कार्यकर्तात किपूया पांगा दोवाटो सल्यांचा लागांनिसें छगू कथं र्‍याली यानाः हे त्रिभुवन विश्वविद्यालयया उपकुलपतिया ज्याकुथिइ वंगु खः ।