थप लचिलो जुइत तयार
येँ (झीगु स्वनिगः)
एकीकृत नेकपा -माओवादी)या नायः पुष्पकमल दाहाल प्रचण्डं शान्ति प्रक्रिया निष्कर्षय् थ्यंकेत माओवादी अझ नं लचिलो जुइत तयार धकाः धयादीगु दु । ज्यापु समाज यलया म्हिगः शनिवाः जूगु १८ क्वःगु दँमुँज्याय् न्वंवायेगु झ्वलय् वय्कलं अथे धयादीगु खः । नेता प्रचण्डं तःधंगु व जिम्मेवारी दल जूगुलिं शान्ति प्रक्रिया पूवंकेत अझ लचिलो जुइत तयार धयादीगु खः ।
शान्ति व संविधानया नितिं दलत मिलेजुइगुया विकल्प मदु धकाः धयादिसें वय्कलं मेमेगु दलत सहमतिइ मवल धाःसा माओवादी याकःचां जूसां शान्ति प्रक्रिया पूवंकेगु जुइ धकाः धयादिल । ज्याझ्वलय् कांग्रेसया उपसभापति रामचन्द्र पौडेलं शान्ति सम्झौता कथं हे न्ह्याः वनेमाः धकाः बहः बियादिल । अथे हे एमालेया नायः झलनाथ खनालं शान्ति व संविधानया नितिं प्रमुख दलतय्गु दथुइ एकता मजुल धाःसा मुलुक विभाजित जुइ धकाः ख्याच्वः बियादिल ।
